बड'लेण्डखौ खेबसे गिदिँबाय आं Poem by Ronjoy Brahma

बड'लेण्डखौ खेबसे गिदिँबाय आं

फुंनिफ्राय जागायदोँ-
दाउज्ला गेसेरनायनि सिगां,
फुं आरो बोथोरा बेसेबां समायना
बरनायथ'लिया आं।
-
सिरांनिफ्राय कक्राझारसिम-
सिउ सिउ अं अं बोलो होनानै
गान्दा खिँगुर(सावगारि) गोनां
ए स टि सि बोराया खारदोँ
बिनि सिंआव आं, आंनि फोरोँगिरि सासे
बांगाल जुंगाल हार्साफोर गोबां दं
बिसोरनि सोमोन्दै बुंथ'लिया आं।
-
फोरोँगिरिनियाव सोँदोँ आं-
समायना रमायना बै एफा समायना न'आ सोरनि?
- बाबुफोरनि,
बैलाय बैलाय एफा गोजौ बिल्दीँआ?
- बाबुफोरनि,
बै अन्थाइ दामोल
बै हटेल बै खारखाना
सोरनि जाखो बेफोर?
- बिसोरनि,
नैबे लामाया जोबोद गाज्रि
बेफोर मानो जाखो?
बिनि मानसिफ्रा खौसेथि गैया नामा?
- खौसेथिखौ बिसोरनो सिफायदोँ,
बिसोरनि हानजा दोलोफोरानो,
रायजोफ्रा खौसेथिनिफ्राय गुगाबाय
गामि मोनसेयावनो मोनथाम राजखान्थि हानजा,
नोँ फरायनो मोनाखै नङा-
बर'नि दानि समाज बिगियान
माबा माबि फराखौ?
- अ', नंगौ नंगौ।
नै माथो मानसिफोरालाय उन्दै उन्दैसो
बिसोर बहा थांगोन बाइक लायै लायै?
माथो सिख्ला गथ'फोरबो दं-
बिसोरनि खिबु उनाव बाखोथाब बाखोथाब।
-
बाकसा आरो अदालगुरिसिम-
साफागुरिनिफ्राय अं अं होनलायनाय
सनालु मोख्रा(सावगारि) गोनां
बड'लेण्ड ट्रेन्सर्पटआव गाखोदोँ जोँ,
आं आरो आंनि आमाय(प्रपेसार) ।
-
आमायनियाव सोँदोँ आं-
बिसोरो सोर जाखो
लामा सामा उन्दुसोनाय?
- मिथिया,
अनथाव बाथाव टेला बोदोँ
माथो बिसिया बेन'टि बेगसो हरदोँ,
गानै जोमै देलायलाय फनसो रायज्लायदोँलाय,
माबादि मानसि जाखो बिसोर आमाय?
- मिथिया,
साइकेलाव दाब्लिँ लादोँ बिसिखौ
बिसिया हाजि हाजि फनसो रायज्लायदोँ,
बैलाय हनै हनै आमाय नायहर-
फिसायआ आर'नाय लादोँ
बिसिया साड़ि फान्ना बाइक गाखोदोँ।
-
नै दिनै बेयाव मेला जागोन खोमा आमाय...
गथ' गथाय दंफैयो हौवा हिनजाव
जाला सिफियाव बिसोरहा
दंखायो बुदां बुदां रां।
माथो गासैबो दखनासो गान्दोँलाय
हौवाफ्राबो माथो गामसासो गान्दोँ
नै नै आमाय बिसोर-
बिसोरनि रावआ हार्सानिसोलाय माथो! ?
- जाम्बाबादि दाबुं नोङो,
सिरिथा सिरिथा आमाया आंखौ बुंदोँ।

Thursday, September 17, 2015
Topic(s) of this poem: social
COMMENTS OF THE POEM
READ THIS POEM IN OTHER LANGUAGES
Ronjoy Brahma

Ronjoy Brahma

Amteka (Chirang) /Assam, India
Close
Error Success