जेब्लाबो दाननि उनाव दान नोजोराव
अखा नायब्लानो सानस्रि बड'सायाव
बोसोरनि उनाव बोसोर
फिरफिला सिफुं आलारि
डि बड' मुगानि साखि
फिथिका सोरां जोँमा
बाथौ ब्रह्म बिसम्बि
गोबां आरो मोखां लाइसिफोराव
रोजा रोजा खन्थाइ फरायनो मोनबाय आं
बेखौनो बेखौनो बानाय बानाय लिरनाय
बानायबो मोनथारबाय,
बेखायनो आं गोसो खाङो
खोन्दो खोन्दो सानफोरखौ बारलांना-
लिरनोबो सोलोँगारदोँ आं
लाजिथोँ लाजिथोँ साला सालिफ्रा
मिनिथोँ गाबलायलायथोँ बिसोर
रागा जोँथोँ बोराबथोँ-
जाथो जाथो गाजा सानफ्लांनानै
बेयो थाथोँसै,
मोनसे सल' खिन्थानि आं-
'थै गोजा जबा गोजा
आरो मा गोजा?
खुन गुफुद सुनै गुफुद
दाउब' गुफुद
आरो मा गुफुद? '
उन्दै समाव आसि थुयै थुयै
जाया जाया फोरोँनो मोन्नाय
आयआ दाबो गोसोआव दं।
आफाहा दाबो गोसोआव दं-
'नोँनो नोँ अरननि राजा
दालाय मोनखो बोरैथो साजा'
खन्थाइ सारिनैखौ,
आबैआथ' खम नङामोन
बाब! बाब! हाथाइ साल'ल'नो
खुगान्थिखौनो आवरायोमोन
'उदै दं बाहान्दार गैया,
बिफा थैयो फिसा थायो,
बिफां थैयो रोदा थायो,
मा बेलाइ? ? '
सिखाव दाजा मोनगोनबो मानजा
बुजिया बुजिया सुंथाब सुंथाब।
आबौआ अजासोमोनलै-दां जोँनिया
माबा माबि बुथुमला बायथारोमोन
खिफि बेन्दोँ दुफावलु बेदर
था गान्दा माबा माबि,
खन्थाइबो आवरायोमोन सम सम
संग्राइ सान्द्रि हेबनाय समाव,
आयआ गोसोखां गोसोखां बेखायनो बुङो-
रबि ठाकुरबादि
दारि जामाव-माव,
बिनि खन्थाइया ओरै-
' बार सिउ सिउ बारदोँ
फेरेँगा लानजाइ मोसादोँ,
दुफावलु जोमैया बाराव हालि हालि
रंजाबायदोँ फानफेवालि।'
खबाम गहेना दाफब फुनफब
जोबनाय फारसे खन्थाइया
'गोजौआव मोफौ हायाव बाहागो।'
This poem has not been translated into any other language yet.
I would like to translate this poem