थोर थोर उखैहाबनाय सानफा
नागिरबायदोँ एम्बु मासे हाफा-मुवा,
गग्रा गेग्रेबनि दाउ बिमाया
दोँ दोँ होसोबोदोँ।
बेसे खारनो आंलाइ?
हे जगत मोदाय!
रानज्रिँ लेरलां-लां सोलेरखौ
बेसे बुद्रुबावनो सोलेरखौ।
थाखोमा नाङो आं बेसेबा खष्टयै
खुसेँग्रा ससमाफोरनि
एनजर इंगिनिफोरनि मोनामग्लुं ग्लुं देरायाव।
हे दैनि मोदाय गसाइ!
एम्बु बंग्ला नाफोरखौ
खांख्राइ साम'फोरखौ मन'नो हानायमोनब्ला-
थागौमोन आं दैयावनो।
आंनि खाफालानो सुनि
गास' लांबाय आरोबाव
मै मोसौफोरा लानजायखौ,
आंखौ आरोबाव दुखु होबाय!
खेबसे एम्बु बंग्लाखौ हमदोँ आं
मन'नोबो नाजादोँमोन,
आंनि खुगायावसो जोना खारदोँ।
राहा गैया आंहा
बेसे गोबाव आं थांना थानो!
थांनायखौ मानो थैनायखौनो हर!
सम सम आं लामायाव ओँखारो
आंनि जिउखौ जेन' सोरबा
मिनि खुसि गाख' लाङो,
नङाबा नायगार नायगार आंखौ
दिउ दिउ रागा जोँना बुथारो।
सान्नायनि गोरोन्थि ना
नंखायनि हाबिला बेलाइ?
आंनो बिजिरनो हाया!
एसेबां सम जाबाय थेवबो
लामा खान्दाइ सिल'रा
जिबौ गोरानफोरजोँ जंखाय जाबायसो!
सादु सन्यासिनि नखराव सम सम
जिउखौ गथायनो थाङो आं-
बिसोर आंखौ बिबायारि सानो
दै सान्ति सारै सारै थिनहरफिनो।
खेबनै खेबथामसो सोलेरा गुस्लायबाय
सानसे मोनजानाय सानसे मोनजायै
दाबो आं थांनानै दं,
सुबुंनि न' न' एम्बुनि सोलाय ओँखाम
गले गले मागिहैबाय-
सोरबा सोरबा आंखौ गिनानै
थे थे दर्जा फांथेयो,
सोरबा सोरबा बुस्रोद बुस्रोद
इनाय-बानाय होहरफिनो।
आं जेबो खामानियाव उदाया
आदारबो उदै बुंजासे मोनजाया।
This poem has not been translated into any other language yet.
I would like to translate this poem
"खन्थाइया खहाब गोनां जाथारदोँ। मोनफ्रोम सोदोबानो ओँथि बह्रा।"(सुनिल गोरा)