जाबा दाजा खन्थाइगिरि जाथोँसै Poem by Ronjoy Brahma

हां बोयो हां हगारो
मोनफा मोनफा सोदोब ओँखारो,
मेगननि खेबसे सौदावनायाव
गोसोनि खेबसे बिलिरनायाव
बिसोरबो आंखौ बरायसिनो।
खाइज्रि खाइज्रि लेखा बिलाइयाव
रेबगननि गोदोना सेरखंबायनायाव
गोबाख' गोबाख' जिरायो खावब'
हांखोनि मोनसे बिन्दोआव।
आंनि सेर सेर सोरगिदिँ बार
बिफां-लाइफां समायना बिबार
बिसोरनो आंनि दोँफा खन्थाइ।
गोदान मिथिँगा गोदान बार
गोदान मुलुग गोदान गोरबो
अख्रां जेसे हाबिला आंनि
लैथो जेसे गोथौ-गुवार मिजिँ,
थै गोलोमदै बादि गोथार गोगो,
दै बाज्रुमबादि थांखि।
सोरनिबा आगानजोँ आं थाबायदोँ
सोरनिबा मोन्थोरखौ लानानै?
सोरनिबा गियानजोँ आं जुजिदोँ
सोरनिबा थुलुंगाजोँ?
बिखा हमथानाया सिमां नङा,
मोकथांनि दावहारु बियो।
आगान सुनाया जिउ नङा,
मोकथांनि जोहोलाव बियो।
गले गले सोदोब बर'नो
रैसुमै ओँथि दिहुनो,
गोसोनि सानबोलावरिया
संसारनि सानबोलावरि नङा?
मिजिँ दं बेहा मोकथांनि-
थांखि दं बेहा संसारनि-
जेराव दं मन्दिर मजिद
जेराव दं गिर्जा- गार्जा सिबिसालि,
बाथौसालि बियो-
गोथार बोर दान होसुलि,
सोरखौ नेवसिनो-
सोरखौ बोजबनो-
थुलुंगानिफुरि बेयाव?
दैसा दं जेराव,
गोजोन दं बेवहाय।