दिनै फुर्णिमा: बेमादोँबादि मोन्नै सानस्रि आंनि Poem by Ronjoy Brahma

गोमोथिँ खुसेँग्राफोरा जेन'बा
जेन्थोरसो फिदिँदोँ,
दाउ थाम्फैया माखु खुदोँ,
अखाफोरा हिनजाव गोदाननि महरै
लासै लासै मिनिसुलुदोँ,
सांग्रेमा एम्फौआ जेन'बा
थाखोमा थाखोमा नायदोँसो।
बेल' नङा दंबावो आरो-
रांखो बोराया नायहर नायहर सान्दोँ
गोजां बोथोरनि बाथ्रा-
गोदो बिसम्बि दाहोना समनि समखौ।
लावगि बाजैयाबो गारबा लायैनो
इन्जुर गब्लंजोँ नायहरै
ओंख्रि खामथाब जालायदोँ।
***
बादालिया हाबायावसो मुखुबथार जेन'बा
लाब्रा हायगासेमानि गलांलायदोँ।
फेसा दाउसिनफोरा दुखुसो मोन्दोँ जेन'बा
ग' ग' खाफाल खुलायदोँ।
अखाफोर नोँ हिनजाव गोदान
गोम गोम फेम्फा सुदोँ,
होँगो दोँगो दावराव दावसि
जेरावबो जेरैबो सैमा सोँदोँ
बेदर हारा मुरि गोरान
सेलायनाय बादिसो
खायेँ खुयेँ अरलायदोँ।