जिउनि बेलासियाव Poem by Ronjoy Brahma

थामजि मिनिटनि बिलिडिटिजोँ
समायना मिथिँगानि हायना नांनायजोँ
नोँखौ मोजां मोनफ्लांदोँ आं,
खाम जथा थर्खा जाबख्रिँ
थोर्सि खुरै सिफुं दामनानै
बैसागु रंजानायबादिनो मोसानानै
गामिनि बयबो बिदायहरदोँ जुलिखौ,
गोसोखांब्ला गोसोआ खारलुं मोनो
दाबो गन्थं हमथेफ्राङो आं
सैमा मावजि जाख'नो हालायै
ना बेदर आद्रि आद्रि आग्लायनायखौ।
त्रय नोगोरबादिनो दिनै
आंनि सिमां मिजिँआबो घंस' जाबाय,
आं सान्दोँमोन सना
नोँनि हायना महराव जेन्दोँब्लाबो
जिउनि अराय गोजोनखौ मोनबायथागोनसो।
नाथाय नोँखौ अनै अनैनो
फसन्त बेरनाय बादिसै आंनि गोसोआ,
नोँनि बै मिलौनाया दिनै
खामथाबनाय ओँखाम गोखामबादिसो, मानो?
थेवबो थेवबो नोङो-
नोङो संसारनि मायनाव सना
मिथिँगानि फोरोँगिरिथार नोङो,
नोँनि दखना सुरियाव गोलांनानैनो
आं दिनै सिमां नुयो सना
जोमै बारलां बारलां बेसेबांबा
गोजोँ सोरां स्वयं गसाइनि
दुखु गैयै गाबनाय गैयै सोर्गोखौ।
नोँनि समायना हायना महरजोँ
उथ्रिगारबाय आं ब्रह्मसारिखौ,
नोँनि अननाय मोजां मोन्नायजोँ
उथ्रिगारबाय आं बैसोनि गृहास्थखौबो,
बिलिरै बिलिरै थुलुंगाजोँ नोँनि
उथ्रिबावबाय आं बानपस्थ्रखौबो,
अनजालि आरोबाव आनजादआ फैगौ
थांनोसै थांनोसै सना आं
हाजो अरन गिदिँ गिदिँ
सन्यासि जानो खेबसेबाव।
नोँ दागाबहर सना दे!
दबा सिग्लाबलायजासे मोदै हुगारनानै
नोँ दागाबहर सना दे!
खाफाल खुथुर खुथुर बैसोमाथायाव
सोरजिगिरिनि गोसोम आथिँआव।