मोकथां जिउनि बिसम्बि: आफानि जौ लोँनाय Poem by Ronjoy Brahma

गोदो गोदाय गोबां बोसोरनिफ्राय
दासिमबो सुबुंफोरा जौ लोङो,
सुबुंफोरनि मादावनो बर'फोरा लोँसिनो,
आजै-आजौ थैलांबाय
आबै-आबौ थैलांबाय
बिसोरो जौ लोङोमोन।
दैसाया थैयो रेगा थालाङो
बिफा थैयो फिसा थालाङो
बिफा जेरै फिसा एरै
बिमाबादि दाजा बिफाबादि जा
बेफोर रावआ बर'फोरनि नंगौ
फोथायबोनाय फोथायथावथाव।
आबौआ जौ लोङोमोन
आफायाबो लोँग्रायानो जालांबाय,
आफाया जौ लोङो।
मागो-बैसागु हाबा फोर्बोआव
सावरि-बादालि हाल जांख्रा
ओँखाम गोरलै आलासि जानायाव
आफाया जौखौ मोनलोङो
जौखौ लोङो बियो।
बेल' नङा गामि गिदिँ गिदिँ
मागो-बैसागु फोर्बोआवल' नङा,
जौनि गलायावबो,
हरफा थोलो थोलो जौखौ लोङो
हरथौहाब हरथौहाब न'मोनफैयो।
लोरलां-लोरथां न'आव सफैब्ला
आयआ सिरि सिरि गाबो,
आब'आ रागा रागा रायो,
आं सिरि सिरि बिग्राय खाङोमोन।
लोथो फेग्लिना आफाया
गोदो उन्दुयो ओँखाम जाया मायानो,
रायजायै रायजायै सिरि सिरि थायो,
रावजोँबो नांलाया बियो,
रावजोँबो बुलायफेराखै।
आफाया जौनि अराय गेजेन
जौआ बेखौ फेजेनो,
जौ फेबा सिरि थायो बियो,
नाथाय गोबां बाथ्रा बुङो
गाज्रि बाथ्राखौ बुंफेरा।
बिनि गारांआ गिदिरसिन जायो
थख' थख' बाथ्राखौ बुङो,
गुबुननि बाथ्राखौ सिरि सिरि खोनासङो
गल' गल' नायगोमो नायगोमो थायो।
नाथाय-
जौआ मानसि मोजांनि सुथुर,
आफानि गोगो राफोद देहाया
जौनि इनाय बानाय गाग्लोबनायाव-
लोरलां बोलो गैयै जायो
आफाया जेब्लाबो गोबायो,
बिनि मेगन मोखां गोरान जायो।
आफाया जौ लोङो
आफानि लोगोफ्रा बांसिन लोङो,
बिसोर आफाखौ लोगो लायो,
नाथाय जौनि गलायाव
आफाया लोथो फेयो,
गुबुन गुबुना बांद्राय फेया।
जौ फेयोब्ला आफाया
गोबां बाथ्रा खिन्थायो
गावसिनि गोजाम बाथ्रा
गोजाम समनि सल' बिसम्बि बायदि।
नंगौ नङाखौ आफाया
गोथौ गियानै बिजिरा,
बाथ्राखौ गोसोआव लायो
मोनाबिलिनि ओँखाम जानाय समाव
जोँनो फारि फारि खिन्थायो।
जौनि गलायाव खोथाया बाङो
आफाया बुथुम बुथुम लाबोयो
खिन्थाथाव बाथ्राखौ बियो
फारि फारि खिन्थाफैयो।
नाथाय फरायसानि जिउआव
गुबुननि दुखु गोनां सल'आ खहा,
बिसोर दुखु मोनफायो।
आफाया गुबुननि सल' खिन्थायो
आंहा रागा जोँनाय फैयो
आं खहाबा खहाबा मोनो
आंनि आब' फंबायमोनहा।
आं उन्दै, अब्लाबो-
जौ फेनाय आफानि रावआव
खेबसे खेबनैसिम दाद्रि होयो,
अनसुलि आयआ फारनै बाथ्रानि
गेजेर गेजेर जाना बुङो।
आफाया जौ फेयो नंगौ
फेनाय फेयै समावनो
खामानि मावनो आंगाया बियो,
बियो खामानि मावनो जुजियो।
2011 मायथाइनि जेथो दाननि सल'
अखाया हागासिनो हागासिनो दं
सानसे हायो साननै थाथ'यो,
मोनायाव हायो सानाव थायो,
सानाव सान्दुं हराव अखा।
अखा हाहां हाहां बेलासि
आयखौ मदद होना
साइकेलनि फ्रेमाव मायनि बस्टा
गेवलां बाजाराव लाना थांदोँ-
मिलाव होना मायरं लाबोगोन,
आफाया नारदोँ आरआ उनाव
दोँ दोँ गेवलां बाजारसिम।
मोनाबिलियाव मोसौ दाउ अमा
गलि गग्रा फोराव सोना,
मोनाबिलिनि जानायखौ जाबाय,
आफाया गैया
जोँ आय आं आब' आरो
फंबाय साथामजोँल'।
रायज्लाय होनज्लाय ओँखाम जानाय समाव
आयआ बुङोदि-
फिसाल्थेया लिँलांबाय ब्रा ब्रानो
भावरागुरिनि जौ गलायाव।
आयआ बादा होदोँमोन
नाथाय बियो हायाखै,
आयआ हार्सिँ फैनांदोँ,
मायरं बष्टाखौ गुबुननो हरना।
आफाया जौखौ मोजां मोनो
बियो जोबोद मोजां मोनो,
रंजानायखौ एसेबां मोजां मोना बियो
नाथाय जौखौ मोजां मोनो।
जुब जुब अखा हादोँमोन
गोदो गोदो उन्दुलांदोँ आं
आफानि आखुनि सायाव,
आफायादि एसेबां मोजां मोनो
गाज्रि मिथिसेयावबो जौखौ...!
उल्थां-फाल्थां सानै सानै।
अखा हागासिनो दं
फुंनि 4-30 रिँगा जाबायमोन
आं सिरि मोनाखैमोन,
खोरखि बुयै बुयै आयआ फोजादोँ
अलसियानि खेबसे सियायना,
लासै लासै आं सिखारदोँ।
जुब जुब अखा, गोजांस्रिउ मोनो
हाल हुरुनना दुब्लियाव
आयआ थिनो हालेव हैनो,
हापपेन गानना आं आवगायो-
आयनि रावआ गोदै,
आयनि बोसोन आं फालियो
आयनि बोसोन आं नेवसिया।
फाफ्लियाव जुंगाल बानना
आखायाव लावथि लानानै
साथा गंसे हमना
गलियाव आं थाङो।
आं गाबनो ओँखारो
आफायादि मावथि,
नाथाय जौखौ बियो एसेबां-
लोरलां लोरथां आफाया फैदोँ
थिँग्रिँ सिग्लाबनानै।
बियो हराव फैयाखै
जौनि गलायावनो थाबोदोँमोन,
जुंगालखौ आं जुरिबाय
नाथाय आफाया होलांबाय हालेवनो-
एसेबां फेनाय बियो
बहा हालेवनो हानो?
बियो थोर थोर गोजांदोँबो!
आङो उन उन थांफाबाय आफानि
नाथाय आफाया गोजांदोँ
जौनि निसाया खर'खौ फिदिँदोँ
खर'आ सादोँ आफानिया,
आन्थोर मोनसे फोजोबनो हायाखै बियो,
आंनो हालेवनांबाय,
आफाया थोर थोर गोजांनाय
थिँख्लाब थिँख्लाब खर' साजानाय
लोरलां-लोरथां न'आव फैबाय।
खम्बल जोमसे जोमना
ओँखाम जाया माया
बियो गोबाबावदोँमोन न'सिङाव।
आफानि सायाव रागा जोङो आं
जौ फेनाय आफानि सायाव,
नाथाय उन्दै आं,
आफाखौ बुनो हाया
आरो आयनि समाय!
आफाखौ माब्लाबाबो बुवा।
सासे सानै साथाम साब्रै सानोब्ला
आफानि बेवाइफ्रा साजिनिबो बारा
आंनि गोदोसोनाय बर' गामियाव,
बिसोरो आफाखौ मोजां मोनो
आफायाबो बिसोरखौ मोजां मोनो।
बैसागुआव बिसोरजोँ मोसा नाङो
मोसाफेरा मोसाफेरानो,
सावरि जायोब्ला एबा
हाल जांख्रा नङाब्ला
गावसोर ओरैनो जौखौ संदोँब्ला
बिसोरो आफाखौ नागारा,
गरथसे लोँनो आफाखौ
लांफै थारगोन खि लांफैथारगोन।
दाथां फेयो,
बांद्राय गोदाव सोराव रायज्लायो
नंखाय नंखाय बाथ्रा सावरायो
बायदियै बुङोब्लाबाबो
आफाया ब्लद थाङो
लोथो फेना फैयो।
आफाया जौखौ लोङो दाबो
दाबो लोङो लोँबाय थागोनबो?
दिनैसिम आफाया नागारगोन,
लोँलिया होन्ना बुंफेरा,
नाथाय-
बै समनिबादि गलायाव लोँहैनाय
लोथो फेना हराव फैनाय
बेबादि हुदा बिनियाव गैलिया।
जानो जोँनि सोलोँथाइआनो
आफाखौ लाजिहोबाय,
फिसानि मोजां आफाया लुबैदोँ,
दा आफाया सानो जानो हागौ-
फिसाया मोजां जाबाय
बिफाया मानो गाज्रि जानो? ?