गोजोन्नाय मोनमारदिया Poem by Ronjoy Brahma

आंनि गोगो सोलेराव
गोजोँ मिनिसुलु मिनिनायाव,
आं रागा जोँखांदोँ
बैग्रि बिबारनि खुदुमफैनायखौ,
गन्थं बिलिर बिलिर।
हमथे बायो आं गन्थंखौ
नाथाय बिमा अनसुलि औवा बिलाइनि बारआ
बुरखाय बुरखाय थादोँ।
फारलंसे लामा बारबोनानै
नैबेयाव गोजोनै जिरायब्ला,
आं रागा जोँदोँ खायसो बेरे खंख्रमामोनखौ
बेरेमा, बेरे जथामोनखौ।
मानोना-
आं गोलांनो हायाखिसै
लोथो मेंग्लिनाय सोलेरजोँबो,
दलरै जिरायनोबो हालिया आं
मायसालि सिख्लानि मोसानायखौ नायनानैबो।