मोकथां जिउनि बिसम्बि: बंङाइगाव कलेजाव फोरोँगिरि सान Poem by Ronjoy Brahma

थांनाय सप्तासे सिगां बर' मेजरनि फरायसाफ्रा
साफायाव बाजि राङै बर' मेजरनि फरायसानावनो खांदोँ।
बिसोरो खोथाबो होलायखादोँ-
मोनफा फेखेदनि जानाय लान्स थागोन।
माखासे रांनि फोरोँगिरिनि थाखाय
बायदि मिथिस'यै बान्था थागोन।
दिनै 5 सेप्तेम्बर इं 2014 मायथाय।
5 सेप्तेम्बरआ फोरोँगिरि सान।
थांनाय सानथामसो सिगांआव लिरनाय
दोँसे गोलाव खन्थाइखौ फोजोबदोँ आं।
बेखौनो दिनैनि सानाव फोरोँगिरिनि सिगाङाव
आवरायथिना गोजोन होगोन।
9 रिँगानिफ्राय जानांगौ फोरोँगिरि सानखौ
10 रिँगायावसो जागायदोँ जोँ फरायसाफ्रा
(माखासे उन सिगांनि फैलायनायनि जाहोन दं) ।
10 रिँगानि एसे उनाव खेखखौ
बर' आयदानि गाहाय ज्योति सारआनो हायो।
बिनि उनाव फारि फारियै
मेलखौ आदा दनिराम, रासित, आब' जिरिनामोनानो दैदेनो।
मोसाग्लांना फोरोँगिरिमोनखौ गोजोन होयो।
बिनि उनाव जोँ गावनो सुजुनाय
गावनि खन्थाइनो गावनो फरायथिना होयो।
आंबो जोबोद खुसियैनो
आंनि लिरनायखौ फरायथिना होयो।
फरायनाय समाव आंनि आथिँआ
मानोबा थोर थोर मावदोँमोन।
खुनुमथै आं अब्लाबो गोलावैनो फरायथिना होयो।
नाथाय जेब्ला फोरोँगिरिया
खन्थाइनि रावखौ सोँबाय
अब्लासो जाबाय जारलाया।
फोरोँगिरिया सोँदोँमोन-
'मा रोखोमनि खन्थाइ बियो? '
बाथ्रा फंसे दं-
खन्थाइगिरिया गावनि लिरनाय खन्थाइखौनो बिजिरनो हाया।
आरो आंथ' खन्थाइगिरियानो नङा।
आंनि थाखाय बोरै जाथावगौ?
मोजां मोन्नाय खहाबनाय थानायखायनो आं खन्थाइ फरायो,
गोसो थाखायखायनो आं खन्थाइखौ जाबा दाजा लिरो।
फोरोँगिरि सोँबाय जेब्ला'
आंबो फिन्नाय होथार नांगोन।
जादोँ एबा जायाखै बेखौ बिजिरनो हाथ'वाखै।
आं बुंबाय-
'बेयो गोदान खन्थाइ,
गोदान खन्थाइखौ फरायनानै
गोदान खन्थाइखौनो आं लिरदोँ।'
बेबादिनो मेला आवगायगासिनो आवगायबाय।
फोरोँगिरिफोरखौ जोँ साफा साफायै
बोसोन होनो खावलायबाय।
फोरोँगिरिफ्राबो गावनि फरायथौनाय रोँनाय गियानजोँ बोसोन होबाय।
फरायनायनि थाखाय माब्रै फरायनांगौ,
माबादि फरायोबा मोजां।
आरो फरायनायजोँ लोगोसे
फरायसाया जिउआव मा मावनांगौ दं,
माबादि आखु बाहायनांगौ।
गेदेरखौ माबोरै मान होनांगौ,
माबोरै सिबिनांगौ?
उन्दैखौ बोरै अन्नांगौ,
माबोरै गावनि रोँनायखौ गुबुननो मिथिहोनांगौ बायदि बायदि।
दिनैजोँ बर' आयदानि फरायसाफ्रा
बंङाइगाव फरायसालिमायाव फोरोँगिरि सान फालिनाया
थामथि बार जाबाय होन्ना
गाहाय फोरोँगिरि ज्योती सारआ बुङो।
बिनि उनाव आरोबाव जोँ
फोरोँगिरिफोरखौ दोँफा मेथाइ रोजाब होयो।
फोरोँगिरिफ्राबो रोजाबो गाव मोजां मोन्नाय
बायदि गोजाम गोदान बर' मेथाइखौ।
आरोबाव जोँ साफा साफायै
फोरोँगिरिफोरखौ मोसा होयो,
फोरोँगिरि सार आरो मेडामोना बायदि फावै मोसायो।
जोँ हाजासे रंजानायाव मिनिदोँमोन।
बे समाव आं सान्दोँ-
'उन्दै समनिफ्राय गेजेर आरो गोजौ फरायसालियाव
फोरोँगिरिफोरजोँ रंजालायनो मिनिलायनो मोनाखैमोन।'
दिनैनि बे साना आंनि बेसेबांबा
गोसोखांजाथाव जाना अराय थासिगोन।