अलसिया मेलेमनि सियायनाय Poem by Ronjoy Brahma

बुजिया सोमजिया बबानि मेथाइबादि
बिजिरख'नो हायै मेलेमनि सानखान्थि
आथिँनिफ्राय लानानै आखायनि आसि
हाथाय मेगन गन्थं सानब्लाबो
दोँफा दोँफायै खानायदोँ सानब्लाबो
फिन्नायखौ मोनगोन मोना मेलेमनि
-
बबे रोदाजोँ बबेनि फिन्नाय
दाजाब दानख' खालामब्लाबो
रानलाय सानजाबलाय खालामब्लाबो
बबेजोँ थायो फिन्नायनि देँखोआ?
-
आं सिरि मोनो नेरसोननि रोनावनायजोँ
अब्लाबो बिजिरख'नो हाया
मेगन हुब्लिर हब्लिर थानाङो
गोसो जग्रबनानै इनाय बानायनो
-
बिसोरो खोमसि सौसि सौसि
अरननि उनाव लैथो सानस्रिना
फिनज्राब फिनज्राब हाजोखौ बारनानै
सनानि संसार जादोँ
ग्रह नखत्रनि हासार लाबोनानै
आं नाथाय जिरायनानैनो थानांदोँ
जेराव मोनजादोँ बेवनो थैगोन आं (?)
-
अख्रां गोग्लैसिन्नायजोँ समान
आंनि आन्दायनाया
बांग्रिँ मावनायबादि मेलेम
जेरैबो थांनो हाया आं
-
अ', बेयो जेबो नङा
जेबो नङा बेयो
बिसोरो जोबोद जाम्बासो
आं उन्दुनानैनो थागोन
-
अख्रांआ गोग्लैसिनबा
आं सौखि सिङावनो एब्रेगोन
बांग्रिँआ फैयोब्ला बिफांआवनो गाखोगोन
आं थैब्ला, आंनि फिसाया सोर? ?