आबौ/ आबौखौ गोसोखांनानै Poem by Ronjoy Brahma

बियो थांबाय कम्बल जोमनानै
मेगन मेसेबनानै
सि गुफुर जोमनानै
गोदो गोदो उन्दुनानै
गोदानै संसार जाहैसिगोन
जोँ नुयै बेसेबा गोजानाव
हाग्रा एवस्रांनो सिखा गंसे
मेंबा जिरायनो खामफ्लाय गंसे
बिड़ि मुथासे हरफादोँ
आबौ गानग्रा जोमग्रा हिफोरखौ
सेन सारै सारै मोदोमहोदोँ
आबौनि खामसाव मोखांआव
थाव गुबैजोँ देलायहरदोँ
आबौनि मोनग्लां खानायफोरखौ
मैसो गंनि खानजंजोँ खानखावदोँ
बोथिसे जानो सबायजोँ साम'जोँ
नाफाम बाथोनबो मायब्रा ओँखामजोँ हरफादोँ
सोरबा फिथाइ सामथाइ
सोरबा बिड़ि सिगारेड्
सोरबा मल मल जौ बथल
सोरबा बोथिसे जोसा ओँखाम
सोरबा बायदिसिना गोनां आयजेँ
आयआ सेन्देल जरासे
थोरसि लथा जरासे
गस्ला गामसा जरासे हरदोँ
आफाया संग्राय सान्द्रि जरासे
मोसौ होग्रा लावथिजोँ थखन गंसे
नैजि रां होनानै बुंहरदोँ-
''नै आफा बे रांखौ
नाव गाखोनो लानानै थांदो''
गिर गिर आहुतिनि अराव
गोदै गोथाव मोदोमफ्रु फिथाइ
सावफुं सावफुं
रायजोफोरा आर'ज खालामदोँ
गोजोनै थाहैथोँ
आलो गोजोन थाहैदोँ होन्नानै
ॐ सान्ति सान्ति सान्ति! !
आगदा आखायजोँ दै गोथारजोँ।