आं जिउखौ गोदानै बिजिरनो लुबैयो Poem by Ronjoy Brahma

जोनोमनि उननिफ्राय
संसार मुलुगनि गुमुरा
बारजोँ बार खोमायाव सौग्राव फैयो
बेयाव सान्नाय आरो
जिउनि मोन्दांथिया अरखि जोँखाङो
-
थांखिनि लामायाव
जेराव आथिँआ मेंरुनायनि फोरमायनाय गैया
बेयाव थाद'नायनि मिजिँ गैया
गोदान आबहावानि जोनोम
बेयाव आं बिसोरजोँ जुजियो
हेँथायै हाद्रि आरो हाब्रुफोरनि
-
साया होनो मिजिँनि बिलाइ
गोसोनि गुफुं गांखंफोरा
लह्रायै खंगा जायोब्ला
आं जुजियो अब्लाबो
-
गोसोनि फैसालियाव गोदानै
सानस्रिनि आबिर बिलिरफैयो
अब्ला
आं जिउखौ गोदानै
बिजिरनो लुबैयो
-
बिजिरनो लुबैयो
गोदान सोदोमस्रिनि गोरबोआव
Symbolic नि मोकथांखौ मिथिँगाजोँ।