सिखारदो अलसिया हारि Poem by Ronjoy Brahma

सानासो थांदोँ
हरबा गोलाव खोमसि
सिरि मोनलिया गोदो गोदो
गुसु गोसोआ गोग्लैसोबाय
-
बिसिनि अख्रांआव रिथि रिथि
जोँथि माथि हाथर्खि
जोँनि अख्रांआव सांग्रेमासो
जोङो गोमोरो मेंग्लियो
-
आलारि गोमोरो सिजौआव
जोँनि मायरं एंखुर जानानै
सोरांसि सोरांसि दाउज्लायाबो थेनथ'फिनो
हरा गोलाव दाबोबाव
-
मिथिगौना गेरेमसा बिफांआव
गेवलां बिबारा बाराखै
दुंबुर मेगननि फेलेँआव
बैसागिया फैसालि बोलायाखै
-
थेवबो राहाया दं-
गुसुआ फोजाबाय
सान्दुं सायनो
फैदो सिरिमोनबाय नोँसोर
अलसिया दाजासै अर सुखांनो
-
दाउ खौऔ गाब्बाय
खाम जथा सिफुंजोँ
सिखारदो अलसिया हारि
मुलुगनि जौसांआव गसंहैनो।