गामियाव बांसिन गोजांदोँ Poem by Ronjoy Brahma

मोनासि मोनासि सान एब्रेनाय समाव
लावमुराया खौखाब मावबायमोन
बारिया साहिआवलायाबो
थोर थोर गोजांबायमोन
-
ब्लाव जोङो
स्रोब गोमोरो
दारमासिनि जिगाबनि अर
गय दनायखं नागिरना मोनाखै
औवा मुरा लायनो गोजाननि बाथ्रा
-
थांगासुरि फानफ्रबदोँ
गोजां गाया गया
थोर थोर खौखाब मावदोँ
जिबौ मानखोनायबादिनो
-
हरा मेँबाय
ख्रब ख्रब सिगुण बिलाइ
मिनि गेवलां मोसादोँ
बारसिन बार खोलो
नांफैदोँ आंनि मोदोमाव
-
हर गोलाव हर
साना माब्ला ओँखारो
नेनो बेसे गोबाव
बर'प गलिदोँ जानांगौ हिमालयनि
-
आरोबाव
बिसोरबो गोजांदोँ बारा बारा
थरथिँ थरथिँ निहोरजोँ
जोमैनि गलिनाय बर'पजोँ
-
माय जिगाब दं लुन्दुन खलानाव
सैमाफोरा रोनावदोँ
बस्था गिजि नागिरनानै
सोरजिगिरिनि गुदुंसिन एम नांगौ बिसोरनोबो
हां हां हां..... स्लगान।