ब्लाव ब्लाव गय दनायखंनि
अर सायनानै
आं मेंग्लिबाय
थेवबो आं जेन्नो राजि नङा
बयनिबो गुसुसिन बे हरजोँ
-
बालाबगासे हरखौ फेजेन्नानै
दान्दिसे रंजानाय मोन्दोँ
फुंनि सान्दुं बार मोन्नानै
दा आं गोजांस्रिउ गोलोमस्रिउ
-
मानसिनि बिगुर मानसिया खुदोँ
लिरदो गोरबोखौबो जावखा जावखा
मेलेमनि बेसेनखौ खमायदोँ
मोदोम गिलिरनि बेसेना बांदोँ
-
मिथिखा बुजिखा सोर बियो
गावनि थैजोँ आबाद फोथांनो
रानस्राव हायाव हाब्रु जायै
मिथिगौ थैया थै नङा जुनारफोरनि
थै लोङोब्लासो गांगायो बिसोर
-
आबादा बिलाइ खिलिबाय
सोर आबादारि दंबावो दिनै
बिलाइ गांनैयाव इयुन सिनायनाय
बबेनिफ्राय फैयो एम्फौ
बबेनिफ्राय जागोन जोबनाय
-
थै होग्राफोरनि आगान नुनानै
बिखा जाग्राफोरनि मेथाइ खोनानानै
बबेजोँ थांनो बबेजोँ खारखोमानो
गावनि गंसे देराखौनो अनसायनो
गोजांस्रिउ गोलोमस्रिउ मोनो आं।
This poem has not been translated into any other language yet.
I would like to translate this poem