रैसुमै: आंनि जिउ रजेनि Poem by Ronjoy Brahma

मोनफा मोनफा सोदोब
बेफोर सोदोबनि सोदोबफोरा
खुबैहरनाय अनजालिनि
आंनि जिउ रजेनि
-
गोरबोआव बानाय
अनजालि गुफुर दाउथुखौ
खुबैनाय नङा दुखु होनो
बे खुबैनाया थरफा आदारसो
जायखौ खनजाना गोजोनसिन मोनो
-
बेफोर सोदोबनि सोदोबजोँ
आं खन्थाइ सुजु हायो
बेफोर सोदोबनि सोदोबफोरा
गोजोन मोन्नाय बिखायाव एब्रेयो
-
बेफोर रैसुमैनि बिबारखौ बोनथुमनो
दा आंनो नांगौआ फालि
एबा गोथौसिन गुवार जलंगा गांसे
जायखौ माब्लाबाबो आद्रि जानो होआ आं
-
गोगो बेफोर सोदोबनि सोदोबजोँ
नांगौ जायोब्ला दोँफा मेथाइ
फुंनि मिनिजि निहोरजोँ
गोरबोनिफ्राय गोरबोजोँ खन्थाइ
-
बेफोर सोदोबनि सोदोबफोरखौ
आं दा सोदोब बिहुंआव खनसायनाङा
एबा लैथोआव अख्रांआव
दाउसिन-दाउलानियाव बिबायनाङा
आरोबाव खुथार खुथार अनजालिनाव सोँबाय नांलिया।