मोनसे खसरद Poem by Ronjoy Brahma

हास्थायदोँ बाराबाव लुबैनानै
ओँथि गैयै मागिबायदोँ
खोमसि खोमसि बोलो गैयैफोरनि दर्खँआव
हारा गैयै सुबुंफोरनि दर्खँआव
-
बेराय जायै गुसुआव उन्दुहाबदोँ
हालेव जायै सान्दुंआव मेंग्लिहाबदोँ
बैसोर खोमसि खोमसि हाद्रि बिरहोदोँ
-
बोलो गैयैफोरनि थैजोँ
आखिगासे सावगारिया हाब्रु जादोँ
बेयाव लेवार बेलावनि आगान
ब्रे ब्रे खुगा सोमब्रनाय बैसोरनि
-
मुगानि उनाव मुगा
जोनोम गिबि मेलेमजोँ हासार जानाय
बे गोथै सोलेरनि आबादखौ
खोमसि खोमसि बैसोर हलाबदोँ
-
बहा थागोन बहा जिरायगोन
स्रांगोमामोना बेवहाय मेंग्लिब्लाबो
मेंग्लियैबादि बिरथिँबायदोँ
अखाफोरनि सोरांआव लासिँसिं
-
हाथर्खिफोरा नायखोमाहरो
सोर्गोआव थानानै मिनिहरो
नोँसोरनि मेंग्लिनायाव बैसोरनि गोजोन्नाय
बेखायनो मेँनायखौ मानोबाव
-
मेलेमखौ उन्दो बिसम्बियावल' दानायसै
बै बारा बोजबाखै नोँसोरखौ
नारै नारै नारहरदोँसो
बेखायनो मोनसे खसरद
बे खसरदजोँ मेलेमखौ उन्दो जांख्रिखांदोँ।