आमटेका Poem by Ronjoy Brahma

बेसेबांबा बोसोरनि सिगांनिफ्राय
जिरि जिरि सान हर अराय बोहैदोँ
दैज्लां-मेसेँ बायदि महरै
गुबुंले गोजोँ आमटेका दैसाया
~
जमनागुरि कझगुरिनिफ्राय ओँखारनानै
आमटेका हाथाइनि सेरजोँ जिरि जिरि
खोला मोखां जानानै ओँखारलांदोँ
जोँखोल माखोल मिनि खुसि
नाथाय समाव गेन्दा महरै ना साम'खौ बिखायाव गोबानानै
~
रिउ रिउ दालिगामि साफागुरि जानानै
30 कि मि फ्राम आमटेकासिम
45 कि मि गोजान बिजनीनिफ्राय
साहा भुटान हाजोनि आफाङाव
नैजि जौथाइनि हादान आमटेका
दै अखा हान्था मेलानि टेका बेयाव
~
बायदि खान्थाल थाइजौ
साल सिगुण लावख्रि बारिमोन
दा समायना बर' गामि बेयो
गय फाथै बायदि फिथाइनि बारि
लाय लाफा मैगंनि बारि
~
साल आमलाय कझबारि
दंफां हाखर हाब्रांखौ लानानै
बेवहाय गामिनि मुं जादोँ
महर मुस्रि फोथारजोँ मुं जादोँ
~
1965 मायथायनि उन उनाव
1966 निफ्राय 1968 मायथायनि सेर सेर
हाग्रा एवस्रां बिफां दानस्रां
आमटेकाया गामि जाफैदोँ
~
आमलायगुरि अक्षिगुरि सालाङि
आमटेकानि गामि
सालगुरि सिमलगुरि सिदाबारि
बिफांनि मुंजोँ जानाय बर' गामि
~
दैखरगुरि दैबोरबिलि अन्थाइबारि
आमटेकानि गामि
दहलाफारा मारुंफारा नबबिदाङी गोबां
मिथिँगानि महरजोँ दोन्नाय बर' गामि
~
समायना रमायना जेरैबो मिथिँगानि
बिफां-लाइफां बारि बागान
गामि गामि गोम गोम न' बां
बैसागु फैयोब्ला समायनासिनबाव
~
गाबनाय-मिनिनाय दुखु हांमा
बेवहायनो नांलायनाय-खमलायनाय
जाबावो अनलायनाय-बुथारलायनाय
सावरि-बादालि हाबा खेराय
~
गोसोम गुफुर जाम्बा सियान
आमटेकानि गोरबोआव जोनोम जायो
बेनि थागिरिफ्रा गोदोनि सा-गवालफारानि
कक्राझार गसाइगामि रमारि बिजीनि
दानि बंङाइगामि बासुगामिफोरनि
~
माय फाथो बेसर
सबाय सिबिं थारुन बायदि
आमटेकायाव आबाद जायो
बेवहायनो हिन्दु कृष्टान संसार जायो
~
फैलाव बर' गामि आरोबाव
मोनफा मोनफा हादान गायसनदोँ
गंगार हाजोनि आफाङाव
बिमा बिफानिफ्राय जुदा जायै जायै
सनाजुलि गोजोनफुरि थास'बारि
सालबारि लालबिथि हाजो मोनहैनाय
~
गंगार हाजोजोँ गोरोबनाय
मावरिया हाजोआ नायनो समायना
बेनि जिरि जिरि बोहैबोनाय
गोगो दैसायानो आबादारिखौ फेदेरो
~
थमेन्नाय गेवलां गेवलां बिबारबादि
आमटेका हाथाइयाव फरायसाफोर
बेसे समायो गदायनि जोलैफोर
गुदि गेजेर गोजौनि बिसोर फरायसा
~
समायना नुयो हाथाइखौ
बेवहाय आबै आबौनि संग्राय सान्द्रि
आदै मादैमोननि मैगं थायगं फान्नायखौ
गामसाजोँ दखनाजोँ होँगो दोँगोखौ
~
लाय लाफा मुला
ना साम' खांख्राय
सुखुनि दुखुनि खौरां मोनो
अरायसम फुं बेलासि आमटेकायाव मोनो
~
समायना आय' बे गामिया
खाम-जथा-सिफुं रिँनाय
मागो-बैसागु बायदि फोर्बो रंजानाय
गलि गग्रा मायहुं लुन्दा लुन्दी
~
समायना नुहरो गंगार हाजो
बिनि सेर सेर आफाङाव
सोमखोर गोम गोम अरन
समायना नुयो सोरगिदिँ गामि
~
बेयाव सानसे दंमोन बेसेबा
मै मोसा मैदेर सेसा
दंमोन जलं फलान गोलाव फलान
दंमोन थेफा फलान हाराव फलान
लावथाइ फलान दंमोन
आरो दंमोन सिखो फलान गाग्लेब फलानमोन
~
फैलाव दैज्लांनि माय दुब्लि
जोँखोल माखोल दैजोँ
बेसे समायना सावथाल दुब्लि
रिउ रिउ रिउ गुवार
~
सनाथि जोँथि माथि फैलाव
गोजां बोथोरनि मोदोम बह्रा
बेसे समायना नुयो सालाङि दुब्लि
फुंनि निहोरजोँ साननि सोरांजोँ
~
आमटेका आय' नै आमटेका
आंनि जोनोम गामि आमटेका
मुङा मानो आमटेका जाखो नोँनिया?
अन्नानै सोर होखो नोँनि मुंखौ?
~
आबै आबौआ बुंलांदोँ
टेका (Support) गैयामोन गोदो
हादान लाफैनाय समाव मदद होनाय
सोरबाया सोरखौबा मोजां मोनाखैमोन
~
आरो हाग्रा बंग्रामोन जेरै
थाबायनो लामा गैयामोन
दै अखानि थाखाय दिगदारिमोन
अदेबानि बेनिफ्राय टेका-आमटेका जादोँ
~
थाइजौ गोखै अराय बोहैनाय
साहानिफ्राय खोलाहा दैसा मोनसे
बेनिफ्राय आमटेका जानायनि सल' दं
हार्सा बांगाल बिहारीनिबो बाथ्रा फैयो
~
आय' गोदो गोदोसो मोनो
आमटेकानि जारिमिनखौ आङो
नांगोल जुंगालआनो बेनि हाथियार
जेखाय खबायानोमोन ना हमनो
~
आसार खान्थि सोलाय बोबाय
बोसोरनि उनाव बोसोर
सान्नाय हनाय दावगाबाय
सोदोमस्रिया दिनै गुस्लायबाय
~
बेवहायनो दंमोन गोदो
लावखार गथ' बखालि गथ'
लावखारनि सिफुं सुनाय
नासिना हाबा जानायाव गदां खुज्रा
~
बाथा गेलेनाय गैलिया दिनै
थायलाद' बिफांआव बादुंगा
जाम्फै बिलोआव बादुवा गेलेनाय
गैलिया आसौ बिसौ
आमाय जुमाय गेलेनाय
रंजालु बायदि गथ' गेलेनाय
~
गोदानै जांख्रिखांबोदोँ फरायसा
बिगियाननि गोरबो लानानै
बिसोरनि हाथियारा गोफार रेबगन
मोकथांनि Ballistic Missile जोँ
दावखो लांगासिनो दावखो लांगोन।