बे हराव आं उन्दुलांगोन Poem by Ronjoy Brahma

गोदो गोदो उन्दुनाय समाव
सिमां नुहां नुहां जानायाव
आं सिरि मोनो
~
दाउस्रिया फिसाखौ बुङो-
जागोन जागोन फुं जागोन
अनजालिनो बे बाथ्राखौ हैनो
गोर गोर थांफैनो सानो आं
~
नाथाय हरा जामाखै घड़ियाव
हरा बांदोँ थौगासिनो थौदोँ
आंनि उन्दुनो आंगायनाय बांसिनदोँ
~
अब्ला हरा होमबा
सोरांलिया?
माब्ला सोरांगोन?
~
बे हरखौ होखारनो आं जुजिलिया
हर आं नेनो
हालिया होन्नानै
~
अखाफोरा थानायमोनब्ला
होन्नानै अखाफोरखौबो लुबैयाखै
मुलुग बुंजासे जिगाब गोरान
जोँफ्रुद खाथिखौबो लुबैयाखै
~
बे हराव आं उन्दुलांगोन
मोनसे गोसो फोजोँनानै
जाय साननिफ्रायबो सोरांसिन
बारनिफ्रायबो जाय गोख्रैसिन
निजोरानि दैबादि गोगो मोन्दांनाय।