खारलुं बमा Poem by Ronjoy Brahma

आं हिर'सिमा आरो नागासाकिनि
बाथ्राखौ बुंनो सानाखै
बुंनो सान्नाया नैबेसो
नैजि जौथाइनि बबेबा जिथाइयाव
सा गवालफारायाव थरसे बमा बेरदोँमोन
खारलुं बमा
~
थैनाया थैदोँ
बिसोरनि बेगेँ हासारजोँनो
बाङाइगामि आरो खेँख्राजाहाराव
दिनै मार'वालि देस'वालिफोरनि
अख्रां मोनहैहां न'
बिसोर मुंखौबो गुरलाब सोलायगारबाय
गाव फुरि बायदि गोखै दाजाबदाजोँ
~
सोरबा सोरबा सिखा रुवा दैनो रोङैफ्रा
बेवहायनो बान्दा
नांगोल बान्नाय मै होग्दिँनायनि बाथ्राया
बुंनोबो जोबोद गिलिद
~
बिसोरनो जोँनि गोदानै फसंनाय
बैग्रिबारि लावख्रि सिदाबारि
अन्थाइबारि खासिबारि
लालाय जलायफाराखौ खिन्थानोनो लासिँसिंबाव
~
मान्दे इलांसिखौ नङा
लाफासायख' खुन्थायनारा
खेरा दाबसिनि मानिमुनिखौ
मैगं होन्ना फोथायनांगौआ गोरलै बाथ्रा नङा
~
जोँ मानसि गांसो जाग्रा
बेन्दोँ बेनलाखौ मोसौआसो जायो
अदेबानि सहरनि मोसौआथ'
नेमखि गजा फुरि मिष्टी बिदै लोँग्रासोबाव
~
थाखा होआ फैसा होआ
गय जरा फाथै जरा होनानै
अबंलावरिखौ मोनमारगोनसै
बेसेन होब्लासो बेसेनखौ
मोनगोन नङा?
~
बाथौ बमा? ना अमा बमा?
आरोबाव खारलुं बमा?
मावरिया हाजोनि सेर सेर
दाबो हा खालिया गोबां दं
आरोथ' बिरगोस्रि सिखोनामोन
थेँफाख्रिमोन रोननि थालिम खालामग्रा
बै फैलाव फोथारा दाबो ओरैनोसो दं
~
दायखौ सोरनो होनो
खारलुं बमाजोँ जोखोम जानाय?
ना खारलुं गिख'फोरनो?