लिँकन Poem by Ronjoy Brahma

जोबोद गोसो लानानै
बिफां सायायाव
आं एखमबा गाबनो
गोसो जायो मिनिनाय जिरायनायजोँ
दाउसिनफोरा बाहागो लायो जेरै
-
जोबोद खुसिजोँ
बिरनो नाजायो आं
मिजिँनि बान्दा जानानै
गुफुर दाउथुनि सेर सेर
बयखौबो लोगो लाफानानै
-
मोकथांनि दावहाखौ-
थुंग्रि दोनथ'नानै
नाथाय मोनसे थुंग्रिजोँ
- सिमां बुथुमनानै
सिमांनि फागुणखौ होखारनो
थालिम खालामो आखाय फिदिँनो
-
दखरसे जोमैजोँ थांफायो
दैज्लां आरो मेसेँनि-
बाथिल खालामो लाइमोननि फागुणआबो
बेनिनो जिँगा जायो आं
-
थेवबो-
फैथोँ दै-बार-फागुण
फैथोँ नाग्लि नाग्लि अखा
नाथाय आं गोसोखांनो बावाखै
नोँखौ बावाखै लिँकन।