थांगोन समनि थिन्नायाव Poem by Ronjoy Brahma

गावख्रेबनो हायै सोलेर लानानै
सावख्रेबनो हायै गोसो लानानै
थांगोन समनि थिन्नायाव
आगान फोलाव फोलाव
-
गोमाया बे लामाया
उरसि उरसि थांगोन
एब्रे सिमब्रे सिमब्रे थांगोन
थाद'आ बे सान्नाया
-
अरखि आं खामफ्लंगोन
लामानि सि गोसोमखौ
मिजिँ दं फोथांगोन
मोकथांनि गुबै सिमांखौ
-
दा आं बुथुमदोँ
गुसु मेलेम जोबोद गुसु
मोनसे ब्लाव ब्लाव जोँनाय अरआबो
आंनि मेलेमखौ फुदुंनो हाया
-
दा खनसायदोँ खोमसियावबो
गुसु गोजांनि निहोराबो
आंनि गोसोखौ सुहाबनो हाया
थांगोन समनि थिन्नायाव
-
लामायाव बार-फुंखा फैब्ला
आं अन्थाइ जागोन
लामायाव दै बाना फैब्ला
ना आं सानस्रिगोन
-
थांगोन बोलो लानानै
थांगोन गियान बुथुमनानै
अर आं अर
नुयै खोमसियाव फोजोँगोन अर
-
आं मोकथां
आं मिजिँ
लाबोगोन खोमसियाव सोरां
दुलाराय मुलुगखौ गिदिँ गिदिँ- -