आंनि सायखंआव नुयो रजेनि महर Poem by Ronjoy Brahma

बामब्लेमा खुसेरनाय
सोरबा रजेनि गोरान गुसुथि
एबा गाब होनो लाजिनाय
आं माब्लाबा नुफेराखै सायखं
~
बैसागि जोमैनि फ्रि फ्रि अखा
एबा सियालनि हाबाजोँ
दैस्लुं जानाय आंनि सिलायाव
आथिँ गासोम गासोम बाग्दावखाङो
~
रिउ रिउ फैलाव हायेन
फैलावनि फैलावसिन अखोरां गंसे
बेवहाय आंनि मिनिनाय
अनजालि नोँ गोजोनमारदोँ बेजोँनो?
~
बेवहायनो हाथर्खि-हाला
सान अखाफोर
बिनि सोरगिदिँ गोमो गोथां
बिनिनो सेर सेर नोङो देलाइस्रि देलोँ
~
हांसो सिलारि गेलेफैयो
थब्ल' बिबार बारफैयो
जायख्लं बिनिफैयो बेवहाय
दाउराइ मोसाफैयो
बेवहायनो मोसा सोगोमफैयो
~
सिमांआव सिमांखौ सिमां होन्नानै
मिथिगौ आं सिमांखौ
अब्लाबो सिमां बेयो सिमांल' नङा
रजे नोँ जेराव बिरबाय फैयो
~
बेवहाय दं दैलो मेथाइ
सावगारि गाब दं बेवहाय
मिथिँगा दं मुलुग दं
बेवहाय सान अखाफोर दं
आरो दं मोदै गसरनाय सोदोब
~
बे सिमांआवनो अनजालिया फैयो जेब्ला
आं बावनो हाया सिमांखौ
नेवसिनो हायो माब्ला मेसेँआव
गोरान गोरबोजोँ नेवसि नेवसि
~
आंनि सायखंआव नुयो रजेनि महर
अखा नोँ फैयोब्ला दैस्लुंखौ होलां
अखोरां गंसे गोबानो आं
सान्दुं नोँबो फै हान्थिनायाव
मुलुग गंसे नायनो आं
सायखंआ फैफायो जेरै उन उन।