फेलेँआ फैबावगोन Poem by Ronjoy Brahma

सोदोमस्रि गुस्लायनाय
लान्थिया फागुणजोँ गोबाख्रबजानानै
आवा-फावा
~
नोरजिया बारहावानि
फां-फुं बैसोनि दैथुना
गगा मोनलायजासे
नारसोमदोँ सानस्रिख' हायै
~
बिसोर आंखौ गोसो थोयो
सिमांनि फागुण बिसोरो
थगायो आरो नागारलाङो
अन्नायखौल' लानानै थाङो
~
बोरथिया आबहावानि
हाद्रियाव
अर'नाव
हाब्रुआव
आंजोँ अहा अहा गेलेबाय
~
बै सिमांआ सिमांमारमोन
मोकथां एराय एराय
मोदोमनाय गैयै बिबारजोँ गेलेनायफोरा
~
बैसागुआ फैमाराखिसै
गोरबो फुवार फुवार
आखाय फोलाव फोलाव
फिथा सिथावनि मोदोमनाय लानानै
~
रजे नोँखौ हास्थायनायाव
अबंनियाव आर'ज गाबनायाव
सिमांनिफ्राय मोकथांसिम फैनायाव
थाथ'नांगोन मेंग्लिनायाव
~
बेवहायनो फेलेँआ फैबावगोन
बेखायनो-
टेनसननि उनाव टेनसन
पुषनि निहोरखौ मन'नानै
मन'नाय खौगाजोँनो हगारफिन्नानै
~
हजम खालामनो हायाखै
अब्लाबो-
गोमोदोँ नोङो अखाफोर
गोमोदोँ नोङो मुलुग
ओइ हिमालयनि बर'प नोँबो!