आंग्रिमोन्दा/ अखाफोर गैयै खोमसि खोमसि Poem by Ronjoy Brahma

अखाफोर गैयै खोमसि खोमसि बिरबायदोँ
दैमा-दैसानि सेर सेर
ब्ला ब्ला फाथोसिनजानि बनजार लानानै
नागिरदोँ आदार सानसे उदै सुथेजानानै
-
हाराव-हाथाव हाथाइ आयौ बुहुत
जोसा जोसा मोदोमनाय नागिरदोँ
बिरबाय बिरबाय सिलायाव फैदोँ
सैमा सिरि मोनै खानाय बुद्रु बुद्रु
-
ग्रे गेररर दर्जा नारब्लांदोँ संग्रानि
मोनामब्रुं ब्रुं दर्जा थक थक
राव गैयै खालामफैदोँ नक
खर' सुबाव हर गेजेराव
-
आलाइस्रि रुवाथिया सिरि मोनो
थोर थोर मोदोम मावनायजोँ
मेव मेव खाल फेसा गाबफैनायजोँ
हौ हौ सैमा सोङो गोजानाव
-
बेयो बुहुत नङा
नायनो समायना सासे जोहोलावसो
मिनि खुसि थाङो सानैजोँ
हाजो सा सा बिबार बारिजोँ
-
आयौ एसेबां गिथाव सिमां
हाजो गाहायनिफ्राय गाहायसिन
मानबायो गोलैहां गोलैहां आलाइस्रिया
हाथाइ हाराव राव खौगा सियो
ब्लां ब्लां आजावना थायो
-
आयौ-
खौगायाव ग्लब गोग्लैयो
थाल्थाब गारमायाव थाबथायो
सिमां बियो आयौ सिमांसो
बुरला-बुरथा सौखियाव दिन्दां-फादांसो।