जिउआ थांनाय आरो थैनायनिल' अफसन Poem by Ronjoy Brahma

आंनि गोमानाय साना दुखुनि नङा
बेखायनोथ' आं गोसोखाङो थांनाय सानफोरखौ।
मायदुब्लियाव हाब्रुजोँ गादैलानाया बेसेदि गोसोखांथाव
आरो सिलानि दैस्लुंआव गावनि मोखांजोँ मिनिदेरनाय।
आफानि फाफ्लियाव रोजाबदोँमोन आं मेथाइ
आयनि बिखुंआव सोमावदोँमोन थोँनै आथिँ
हाबाब! बेसेबा गोदैमोन गोमालांदोँ आरो गोमालांदोँ।
आथिखालाव मानसिनि मेगनाव आं नुयो
आंनि मेगननि थोबफा थोबफा
मोदैया सोदोब होयो आंनि बिखायाव
आरो आंखौ नुयोब्ला आवबा जायो दाउलुरनि मेथाइ।
दिनैनि मावनांगौआनो जादोँ मोनसे अलखद
बे अलखदजोँ जुजिनो आं गोहोफोरायो,
अख्रांनि दाउसिनफोरबादि गांखं फुवारना बिरग्लांनो
बरफ हादोरनि सिल एबा फेँगुन दाउसिनबादि।
गोजाम आरो गोदान जथाय बिसम्बि
आंनि जिउआव दिनै रोखोमारि गाब
जेथो गोनां दिनैनि सुबुं आं
नाथाय जिउआ थांनाय आरो थैनायनिल' अफसन