ओँखाम गोरलैनि फिथा Poem by Ronjoy Brahma

गोजाम बोसोरनि मायरं बासियाखौ
आगै मैयानो नोँ सालिनायखौ
आं गोजोन्नाय मोन्दोँ
गोजाम मिलनि मायरं खेन्दासेजोँ
जोँ दिनै लावखार ओँखाम जागोन
-
मोसायै रंजायै आय दैसाया बुसावनाय
बुरै बालाबारिनिफ्राय
दिनै ओँखाम गोरलैनि फिथा जाफैगोन
-
नांलिया होन्नानै
संग्रायजोँ मैया नोँनो जावगारनाय
बैफोर जुजायफोरखौ
खन्थुम फिन्नो नांलिया आगै
बैफोरखौ अमानोबो होनो नांलिया
-
ओँखाम गोरलैनि थरफा फिथाजोँ
गोजोनै गोजोनै
दिनै जोँ बालाबगासे देँखो बोगोन
फैगोन फैगोन साननि मावनां हाबानि बिबान
-
गोदाना गोजोनै फैथोँ होन्नायबादि
गोजोनै आवगाय लांनांगोन
सुखु-दुखुनि थफ्लाखौ जानो हागौ
बे बोसोराव रुजुनबावनांगोन
-
आगै आखायाव हासिबखौ ला
बार-हुंखा फैबावनो हागौ
दाखोर दाला फैबायनो हागौ
गोसोखौ गोरा खालाम
सार-अन्थाइ सोगोमबायनो हागौ
-
नाथाय जिँगानि माला दागान
दिनैनिफ्राय जोँ आवगायलांगोन
नै लाथिख' से ड'खौ लानानै
नै लाथिख' से स्निनि मारुंआव।