समखौ नेनानै दं अखाफोर Poem by Ronjoy Brahma

बाङाइब्लाबो समा दंबावो
दोरोदगासे आगान फोलावब्लानो
बे लामाजोँ लाजिगुसु फैगोन अखाफोर
-
दैमा लैथोनि सा सा
बिफां-लाइफां हाजो बारबोनानै
बे लामाजोँ फैगोन गोदान बोसोर
-
बुसावनाय दैसानि बालाबारियाव
लावखार ओँखामनि मेथाइजोँ
बाज्ल' बाज्ल' बयबो बरायगोन
-
दा दा सान गोरलैया
आयजो बुहुमनि खाफालाव
मिनिसुलु सिन्दुर गाबखौ गाफैगोन
-
जानो हागौ
बयबो दाउसिनमोना
गासै जिबि-जिरादमोना
मिथिँगा सिखोलामोना
सिरि सिरि हांखुर जादोँसै
-
माब्ला ओँखारगोन
हाबाब माब्ला माब्ला
हिनजाव गोदान गोरबोजोँ
बयनिबो गोरबोआव देँखो लुनानै
-
बालाबगासे मेथाइ सुजुदोँ दाउलुर
जानो हागौ
खन्थाइ सुजुदोँ साम'आ
फैयोब्लानो दान्दिसे उनाव
बिसोर जाय फारा फारि रंजागोन
-
पुषनि गुन्द्रासाफ्रा बिरबायगोन
निहोरनि अख्रां सा सा
बे लामाजोँ जै होलांगोन बार
गोदान बोसोरनि जै जै होन्नानै।