सानरोमारोमि समाव Poem by Ronjoy Brahma

नोँनि मिजि मिहि मिहि
जारोम खानाया मोदान हरो
सिनायहरनो नाजायो आं
हांसो सिलारिया गांखं फांथेयो
-
फोथायनाय गैयै मिनिनाय
बे समावनो फुर्णिमाया फैयो
बयनिबो सोरांसिन गोरबोआव
थेवबो थेवबो
सिनायहरनो हायाखै रजेखौ
-
आंनि गिलिर मेगन बिलाइया
लोरो लोरो मावखाङो
मिज्लौ मिज्लौ नायहरो आं
फ्लाम मोफ्लामलायो मेगनजोँ मेगन
-
सोमबा सोमबा गाबनि
आंनि मेगन मोखांङा
गाबदोँ-
आय' बिबारा मानो सिरियो!
-
आंनि गोथां गोरबोआव
रिँखाङो दाहानि देँखोआ
रजे नोँ बहा थाखोमाखो
बुजियाखै नोँ आंनि नोजोरखौ
-
नोँ एब्रेलाङो नुयै थानाव
दैलो सन्दे रिँनाया
अनजालि बियो सानो
गोजौ गाहाय मोन्नै स्केलाव
रजे बियो गारमा हगारो
-
गाबहां गाबहां खोमसिनि सायखंजोँ
लासै लासै फैयो आं
दुबसां मारुंआव आंनि न'
बेसेबा गोजोना गोजोना जायो!