मोनसे गोदान देँखो Poem by Ronjoy Brahma

दोँसे गोलाव राजा लामा बे
थांखिसिम सहैनाय
जेराव जिउनि ओँथिया बेरखांगोन
बैयाव दं जिउनि गोजोन्नाय
-
दाउसिन-दाउला मेथाइ रोजाबो
बे लामानि दालाइ दालाइ
गेरेमसा गेरेमसा बिफांआव
बिसोर मिजिँ आंनि थुलुंगा
-
मिथि रोँनाय समनिफ्राय
बे राजा लामाजोँ जेब्लाबो
सान हर खारदोँ आं
दाबो मोना थाद'नाय जिउनि
-
खारदोँ आरो खारदोँ थाद'वा
मेँग्लिबाबो मेंङाखै आं
साया माया नुहरो
गांगाजासे लोँनो दै बोहैनाय
-
बे लामायाव मोनामनाय
गोथै सोलेर
बाब्राबनाय मरा जिउमा
गोबां गोबां लोगो मोनबाय
-
फैनाय लामायाव सान्दुं लोगो मोनबाय
अखा सार-अन्थाइ
आरो बांग्रिँबो लोगो मोनबाय आं
बेजोँ सौसि सौसि बारनबोदोँ आं
-
थांखि दं आंहा सहैनो
समायना रमायना बै मुलुगाव
जेराव रंजानाय जाखाङो गोरबोआव
दैसा बोहैनाय बिबार बारग्लांनाय
-
खारदोँ दिनै सानमोखाङारि बे लामाजोँ
मिजिँ लाना गोख्रिनिफ्राय गोख्रैसिन
खुसिनिफ्राय खुसिसिन आं
रोजाबदोँ बयबो खोनानाय
मोनसे गोदान देँखो।