दमासि Poem by Ronjoy Brahma

फै फै होन्नानै गोसोजोँ
दमासि नोँखौनो नेगासिनो दङ जोँ
माबार फैथारदो गोरबो हुब्लिरनानै
फै खारस्लिउना सान हर सौसिनानै
-
लारु जागोन सिथाव जागोन
गामिनि फुर्णिमा फोथाराव
जोँलाइ बेलागुर सावना रंजागोन
दहाय दमासि देग्लाय दाख्लामथार अमासि
-
दुलाराइ मिथिँगानि बिखायाव
जोमै खोनाजासे खाम दामगोन जोङो
अखोरां लैथोआ मोसानाय
रिउआ रिउ सिफुं सुगोन
नायफै दमासि रुमबां रुमबां मोसानाय
-
हाजो सेर सेर
दैसानि सेर सेर
लावखार ओँखाम जागोन मिनिखुसि
जोँ थियारिखासै फैदो दमासि
दुलाराइ मिथिँगानि गामि गेजेर गेजेर
-
मिथिगौ नोङो दमासि?
नोँ फैयोब्ला-
दाउखा नुयै दुगैगोन जोँ
फेरेँगा मुसुरै समावनो न' सिबस्रांगोन
आरो गामि गामि उवाल-गायहेन मोसाहोगोन
-
मिथिगौ नोङो दमासि?
बेमा सोँनाय खाम जथाखौ
मुसिहाबनाय आयजेँ आयलाखौ
सारि सारि साजायखाबाय जोँ
नांगौमानि मुवा खनखां जोबबाय जोँ
-
साखोमोला बबेखानि गामिनि सेंग्राफ्रा
बंङाइगामियाव सोदोब बह्रा आहुजा लायखाबाय
खुगा गुवार माइक बक्स लाबोखाबाय
नोँल' फैदो खारै खारै माबार
-
नोँ फैदो दमासि
सिजौ गुदियाव सारि सारि
गोसो गोथार नोँखौ बरायगोन जोँ
घुप घुना सावनानै आलारि फोजोँनानै
गोदै गोथाव आहुति होनानै
-
मिथिगौना नोङो दमासि?
नोँनि मुंङाव अमा खासि
दंखायो फिनाय दाउला खासि
नोँल' फैदो माबार खुसि खुसि
फुषनि बिखाखौ बिसि बिसि।