थरथिँसे मोदै Poem by Ronjoy Brahma

जामब्रि हाबनाय गोरबोनि मायहेन्दोआव
बेखेवजायै अन्नाय
दाउदैबादि बायसै बायसै दोनदोँ आं
-
दिनै बियो गोदान मोन्दांथियाव
लाथा खानाय जिउ
पुषनि बर'प गुन्द्रासाखौ
एरायखे एरायखे थानायसोबादि
-
जिउनि फागुणा फैयाखिसै
आंनि गोरबो बिखाजोँ
सिमलि बिबारा बारहां बारहां
थबसा खाना थानायसोबादि
-
ओजोँ मिथि मोनै
थाइगिर बिबारा बारलांबाय
मिथिँगानि हायना महराबो गुस्लायबाय
बारखुमानाय जिउनि गलाबा
मिनि मिनि सिरिलांबाय
-
गोदान लांगोना आंनि सेर सेर
सोरगिदिँ गुसु आबहावायाव
फामे थब्ल बारनायनि खौरां
हरफ्रोम निहोरमोना आंखौ खिन्थायो
-
आं उदिस मोना
हांसो सिलारिया गां फुवारना
सान हर आंनि खर'साजोँ बिरलांदोँ
फैसालि बोलादोँ फैसालि जोख्लोबदोँ
-
जुलि जायै जायै रंजानोसै
बैसागुनि गोदान अखाजोँ
एम्बु बंग्ला थेरेमोनहा
बिनि सेर सेर ना खुस्रामोना जावरिनोसै
गोथार जुलिनि जैघोनि होयै होयै
-
रावबो नुयै आंनि दुखुआ
जोमैनि आन्दो आन्दो
खाम दामो सिफुं सुयो
लाजिगुसु जिउ मोनसेया
दाउसामोख्रेबसोबादि मिनिखैरो
-
हां मोनसेनि दाबोरसे हाबिलास
आलाय सिलाय गोसो सिगुणा खेबख्लाबब्लाबो
फैसालि मोनसे हांसो गेलेयै बिलोआव
फामे बिबार बारनायखौ लामा नायदोँ!