खोमसियाव दोनजानाय आरो
जौगासारनि लामायाव
सिनायथि गाथे जानाय
मेष असुर दानब बायदि
जोँनो नङामोन मुगानि उनाव मुगा?
-
गोदै गोथाव मोदोमफ्रु
गिर गिर अरमा सालाइयाव आहुति होजेन्नानै
खोमसि गोरबोखौ सोरां होनाय
मेलेम उनै उनै सुबुंनि
नोँनोमोन गुरुदेब मुं मोन्नाय
माहारिनि दाखोर-दाला खनजेन्नानै
-
दिनै-
सावख्ला जानाय थिफुद्ला बर'आ
बावबाय नोँखौ गुरुदेब
नोँनि सानस्रि आदर्सखौ
यज्ञनि आसनखौ जोथ्रोदनानै
फ्लाष्टिकनि सियार बसाय बसाय
-
गुरुदेब नोँनि जोनोम फिन जाबावगोन
जोँ नोँखौ नुवाब्लाबो
नोँखौ फोथायगोन
मानोना परम ब्रह्मआ आंनिनो जिउमा
जिउमायानो मोन्दांथिनि आबुं सोरां
-
मुंनि घोरोमनि
रां राज समाजखान्थिनि
सोलोँथाइ थांना थानाय सिनायथिनि
जौगाथाइ मोन्थाइ जांख्रिथाइनि
गासैबोनि गुदि सोरां लामानि
नङाब्ला नोँ मानोथो गुरुदेब!
-
अरमा खुगायाव नोङो आहुति होगोन
अब्ला नोँखौ बयबो गोसोखांगोन
सानमोखांङारि मेगनजोँ नोँखौ नुगोन
जोनोम जागोन फिन गुरुदेब!
This poem has not been translated into any other language yet.
I would like to translate this poem