गंगार हाजोनिफ्राय होख्रावदोँ आं Poem by Ronjoy Brahma

अमा उरखुनो हायै हाजोनि अन्थाइ थाफा
मानसिया उरखुदोँ खर'जोँ
-
आं बिसोरखौ दाय हमा
दैज्लांनि बानायानो खुरखानो जुजिखादोँमोन बेखौ
थेवबो बेजोँ दा मोदैनि लामा बायसा
लैहोर लैहोर आमदानि हादान सिफायनायनि
-
लामबासि सुन्दाय गोलाव मैदेरा
लोहो लोहो हाथाइ मावलायब्लाबो
बुखुनो हायै साल सिदा बंफांखौ
मानसिया खुगानि हाथाइजोँ अरफायदोँ
-
अखा हालिया बेयाव दिनै
थाइगिर बिलोनि एम्बु जरासेया
बहाबा खारलांबायसो जेन'
दै गरथसेखौ हांखुनसेनो लोँस्रानानै
-
मै सेसानि आगान गोमाबाय
दाउराइ जोलानि मोसाग्लांनायखौ दाबुं
दाउमासार मासे गेसेरलिया बेवहाय
मोसा लख्रानि सोगोमनायखौ
बहा खोनाबावनो?
-
आंखालजोँ नाख्रेबजानाय थेवबो
फालो फालो आखाय हमै हमै
अदाल खनानि मैदेर फालोआ ओँखारबोयो
दैज्लांनि बेसन गाग्लिनो
आसु मायखौ फुयै फुयै बष्टा बुंजाफा लांनो
-
आरो दावहा नांनो जुजियो
सोरनिबा उदखाराव दिखारजोँ सोरजोँबासो
न' बां फामु गाख्रेबलाङो
-
मोसा लख्राया मोसौ मैसो अख्रेबलाङो
बेबादिनो सिमां मोकथां जालाङो
सोरबाया मेगन मेसेबना गयो
सोरबा दरजा जोखाव जालाङो
-
रायजोफोर- -
साना बुहुमखौ सोर सोर गिदिँबाय
अख्रांआव गैया दुफावलु जोमै
दं दाउखा बिदै उखुम सायाव
-
गोलेरा सानखौ ग्लब मन'दोँ
लैथो सिङाव बोसनलांदोँ
साना सौसिनो हायै रोजा खोमसि
दिनै सान गैलिया जोँनि गामियाव।