इसाननि लामाखौ एरायनानै Poem by Ronjoy Brahma

बे लामाजोँनो-
मेथाइ रोजाबै रोजाबै
मोनफैबाय आं मोनसे लैथो
दा गंनै दिङा बे लैथोआव
आंनो सिनाया
बबे गंसेया बादारिनि?
जांख्रि जांख्रि आखाय सोमावहरब्लाबो
थांदो थांदो सना होननानै
खनले खनले बेबादि महरैनो
फैयो फैबाय थायो साना
सिमांआव नुनाय बैनोमोन जिउ
जेराव अनजालिया थायो लैथोआव
लैथोनि जोबथा हायेनाव
अन्थाइ महलनि खना खना
गिखांबाय आं!
ब्लां ब्लां खौगा सिनाय गोलेर दानबखौ
बेरलाव बेरलाव मेगन
खांख्राय नाथुरनि आखाय फोलावनायखौनो
अनजालिखौ हास्थायो
हास्थायथारो-
गावनि जिउखौ लानानैसो आं
बेखायनो आं दिनै गिदिँफिनबाय-
आंखौनो आं मोजां मोन्नानै
दा आं सिमां नुलिया
दुंदुं बै बालाबारिखौ
नाथाय थेवबो थेवबो-
बै मेथाइयानो आंखौ लेँहरो दिनैबो-
अमरनि रुबाइयादखौ
थरफा थरफा मन'नो गोसो जायो आं
सान हर फागुणीखौ थाखोमानो
फागुणनि आन्दो आन्दो
मागोनि जोबथा फैसालियावनो।