गिरिनि माबासो नङा माबा आं Poem by Ronjoy Brahma

गोसो जायो स्लगान होनो-
.
गोसोनि भाबफोरखौ
रिँसार जथायनि मोनफा सोदोबफोरजोँ
दैलो गारां बोनानै दाउलुरनि
मोन्दांथि गोरबो लैथोनिफ्राय बोखांनानै
.
दुलुर दालार मोन्दांथा एबा
फ्रि फ्रि जिरि जिरि सानस्रिनि
रान्ना होनो गोसो जायो
जाय आंखौ नांगौ नांगौ सानो
.
(नुनाय) खान्थि गैयै जिउ-
मिथिँगाया जेरै मोकथांखोर आरो गोरान
रोखोम रोखोम गोबां
बेबादिनो देहा मुस्रिनि खारनाय
.
नाथाय मिथिगौ आंबो
नै सोरजिनि मिथिँगा
सोरजि अख्रांनि दंमानि-
नै लाजिलु मुलुगनि जिउनां-
आंनि गोरबोनि गाबनाय एबा
खुद्रिबायनाय रिँसारथिफोराबो सिमा दं
.
नै मुलुग ओइ सान
नोँ माब्ला थैगोन माब्ला?
आंखि माब्लाबा सोँफ्लांदोँदा-
आं दाबो जाम्बा मिथिगौ नोङो
आंनि गावनो उजिनाय बिखान्थिखौनो दिहुनाखै
.
बेसेबांदि गोसोआव गिनाय आंहा
नाथाय दुगानायबो खम नङालै
नोँखौ नायनो गोसो जायो आं
.
थेवबो आंनि मेगन आथिँ
आरो खोमा गन्थं
बिखाफोरा बेसेबांदि मावो-
.
नोँखौ सोँखारि सोँखारि
एखमबा सालाइखौ सोमावो आं
गोसोनि भाबफोरखौ नाथ्रमनानै
एखमबा जेबो बुङा आं
.
नै गसाइ! गसाइलै-
हा आरो अख्रांनि गेजेर
लांदां जायोब्लानो हामथारगौमोन आं।