बेबादिनो बेसेबा खुसिमोन Poem by Ronjoy Brahma

मेगनखौ बिसि बिसि
साननि सोरां रोदाबादि
आं नोँखौ बेसेबांबा नायहरमोन-
नोँबो आजाव आजाव लायोमोन
-
मेगननिफ्राय सोलेराव
गोसोनिफ्राय गोरबोआव
बेसेबांबा बिलिरै बिलिरै
बिखायाव गोबाना लायोमोन नोँबो
-
नोँनि आगान होफैनाय
आंनि नोजोर गोग्लैहैनाय
बै फोथाराव दिनै आबाद खालामो
सोरबा गोरान आबाद
-
जेराव अखाफोरनि आहार जायै जायै
दुब्रियाबो अराय उदांमोन
जेराव मिथिँगायाबो बेसेबा खुसिमोन
-
दिनै हाद्रि जाबाय बैहाय
जेराव नोँ बेसेबांबा सुदेममोन
जेराव आं बेसेबांबा गोजोनमोन
-
जेराव नोँ बेसेबांबा देलाइस्रिमोन
बेरे फैयोमोन बैहाय
सिखिरि रिउरिउआ बिरबोयोमोन
-
नोँनि मिनिनायनि सायाजोँ
आरो आंनि आफाखिजोँबो
मोकथांखोर गांसो रज'योमोन
-
दिनै नोँ बबे बिन्दोआव
हाथर्खिसो जाहैखो
ना लैथोनि मुकथासो-
ना हिमालयनि बबेबा खनायाव
जोँथि माथि हिरासो जाहैखो?
-
बेसेबा गोबावनि उनाव
नोँखौ नागिरबायो मोना आं
दाबो बैसागुनि लांगोना लांगोना
खौऔ जाना नागिरबायो
-
मिनिबाला बायदेमलाइ सिदेमलाय
बहाबा मोसाबायदोँ खोमा
गायदे हायलुरिमोनजोँ
-
दैज्लांनि दुब्लियाव
हादिदग्ला जाना नागिरबायो
बहाबा मायफोर गायदोँ खोमा
हाम्फे दुम्फे रुवाथिमोनजोँ।