'बार सिउ सिउ बारदोँ
फेरेँगा लानजाइ मोसादों'
बेयो आबौनि बालाबगासे
दानिया आं रोजाबलिया
-
'आव आव आफा आफा
दु-बाबु-दु- '
हैयानावा
आयनि दखना सुरियाव
-
गोदो गोदो आं उन्दुलांलिया
सिमांबो नुनो नाजालिया
आसौ बिसौ लाइसिमोनजोँ
-
एबा बखा बुदां
आदा लरग'मोनजोँ
दाउस्रि बासा गाखोनो
गामसा गिजि गान्नानै
दुब्लाबाथा होसोनो
-
एबा साखोमोला
उन्दै समनि गुदि फरायसालियाव
थास'लाइनि साथा हमना
गोर गोर खारलांनो
-
सैमा लानजाइ हाल्दिँगाजोँ
खुसेंग्रा गोरलै लफायनो
मालाय जाखोन्दा
जलफि एबा बैग्रि बेगर देख्रुबनो
-
खबाम दोरोद्नाय जिउजोँ
आं दिनै सिमब्रे जायो
आरो आंबो जुजियो
मानोना बेबादिनो आंनि जोनोम
-
आं दिनै नेनानै थायो
जुजियै जुजियै
रायजोनि आफादसालियाव
थांनायखौ फैगोन फैगोन नेनानै
This poem has not been translated into any other language yet.
I would like to translate this poem