नोँ नुनाय सिमांबादि आंहा मिजिँ दं Poem by Ronjoy Brahma

मिथिगौ जोँ
माय गायजायै हायाव
गोरान आबादआ जायो
बिनिबो नोगोद बेसेन दं
-
खायफा मायनि थाखाय
लांगा अखाखौ नेनानै थायो
बोथोरा थांबा सोन थायो
राहा खालामनाया मोजांथारमोन
-
जरा नांनाय
अदेबानि दैमा बोहैयो सिमायाव
बेवनो बोखाव जायो
बिदा फंबायनि थाखाय
-
दागाबसै आय
दागाबसै!
आंलाय बेसेबां बुरखायनो?
आंबो गाबनो नांथारबाय दिनै
-
बेखायनो आयनि समाय
आयनि थाखायनो
आयनि मोदै हुगारनो
ओँखारबाय आं बारहुंखा जानानै
-
नै आफा! आफा-
नोँ नुनाय सिमांबादि
आंहा मिजिँ दं
खाना बबाखौ फोजोबनो
-
जेरै जोँ बयबो समान जायो
मोन्थाइनि थाखाय खुगा सिनो
मोन्थाइखौ उदांङै सिनायनो
बेबादिनो आंहा मिजिँ दं