आनजाद लाग्रा आरो आनजाद लिरग्रा Poem by Ronjoy Brahma

दुखुथिया जिउखौ बुरखायनो थाखाय
जोँ मेथाइ रोजाबो मोसायो
बेफोरजोँ गोदान संसार दावबायनो सोलोङो
आरो दुखुथिया जोनोमखौ मुगैफ्लायो
-
जोँनि आलावरि गोसोआ
जानो हागौ खुसि मोनो
मिजिँ सुजुना माब्लाबा देरहायो
आरो लोरबां गोसोआ समाव जेनबावो
-
जोँनि अहं दहं गोरबोआव
आनजाद लाग्रा आरो आनजाद लिरग्रा
सोँनाय आरो फिन्नायनि दावराव जायो
खेबसे उथ्रियो खेबसे दावख्लायो
-
मेगन मोदै फसर फसर
जोँ मुथिखौ फुजिदोँमोन
बोर मोनखांनायनि उनावनो दैयाव गारहैदोँ
बेबादिनो जोनोमनि अनजिमा गैलिया
थगायसुला आरो फोथायखेबस'नि
-
सानमोखां सिबिजाग्राखौ बावलांदोँ जोँ
होग्रा आरो लाग्रानि फाराग जादोँ
जेबो गोरोब लायनाय गैलिया
आनजाद होग्रा आ आनजाद लिरग्रानि
-
मिथिगौ जोँ बयबोआनो
खोमसि फोथायनाय खावरिया आदुवा
मैखुन फाग्लाबायदि बेरसावदोँ
सैमा सियालनि अखा थायफ्रिनायजोँ
-
फैनाय जोँ खोमाहोनि-
बुहुमनि बै गाबख्रावनायखौ खोनासंना
सुबुंथिखौ बिखायाव लानानै
मोकथांनि जौसांआव आखाय हमनि
-
दुखुखौ सुखुजोँ फोलोमनि
ग्रोब ग्रोब उदांस्रिनि हानजा मेथाइजोँ
नोँनि आंनि आखाय थायब्रैनि बान्दोआव
बयबो समानै जोबथे जानोसै