रैसुमै/दैसानि फाराव मोनाबिलिमोन Poem by Ronjoy Brahma

सानसेखालि बादोरनि सोमखोर लांगोनायाव
आयजं मायसालिया सिख्ला देरबायमोन
जेरैबो सोमखोर फैलाव दुब्लि गेजेराव
दाउब' हादिद्लामोना बिरखांबायमोन
-
खेबसे जोमै सिँखाव सिँखाव
हालो-दैलो बिरलांदोँ जोँ
सम सम दैसायाव थुंगे गैयै गोजावलांदोँ
गोरबो सेराव बेसेबा बारा बारलांदोँमोन
-
आं आरो ददेरे अनजालि
मोखांजोँ मोखां रैसुमै रमान्सनि मेगन
दैसाया बोहैदोँ जुलि जुलि
साम'खिँखिरिनि लाजिसुलि मोखां
-
मोदोमनाय गैयै खोस्लिफानानि बिबार
गेरेमसा गेरेमसा इलांसि आजोनाय
बेसेबा समायना जादोँमोन
जेब्ला सोनाब फैसालिनि जारौ सानजोँ
-
बे मोनाबिलिया जानो हागौ
खन्थायानो लिरजानायमोनब्ला-
सोनाबजोँ बिरलांनाय हांसो सिलारिखौ
आं आसि थुहरदोँमोन
-
रजेया बुंदोँमोन- ''रजे! थांदो मोसौ खानांगौ
आरो आंहाबो थांनोसै ओँखाम संनांगौ-''
आंनि आलावरि गोसोआ सानदोँमोन-
सोनाबनि साना दान्दिसे नेथ'बावोब्ला-