स्लगान/दिनैनि थै दुंखावनाय स्लगान Poem by Ronjoy Brahma

सुथुरा जोँनि बिगुर हासिबाय
जांख्रिखांदो हे रायजोफोर
ओँखारदो दावहायाव हे जोहोलावफोर
सुथुरा जोँखौ फानलु-संख्रि सारबाय
-
देरहानायनि लामायाव हाद्रि जोफुंदो
दावहानि फोथाराव गराय दाब्रायदो
देरहाथारनांगौ जोँ दासानदो
दावहा नांथारनांगोन खौसे जादो
-
गिर्जाब गिर्जाब हाथियार लानानै
ओँखारदो मोखां जादो
सानमोखाङारि मिजिँ सुजुदो
जांख्रिखांदो मिजिँ सिमां लानानै
-
सुथुरा जोँनि हायेनाव मै होबाय
अरन हाग्रा-बंग्रा जोँ खारनांबाय
नावखौ जावदो हाथियार दैदो
सुथुरजोँ हे सुबुंफोर फेर मारिदो
-
जोँनि गोरबोखौ खेरासिन लुबाय
जोँनि बिखायाव अर जोँबाय
जांख्रिखांदो हे दावहारुफोर
सेंग्रा-सिख्ला आखाय हमदो
-
संसारा जाबोबाय बेसेबा गुदुं
बिनिनो जाबाय जोँ नामावा बालाबोथिया
बेसेबां रोनावनो?
बेसेबां बाब्राबनो?
-
सुथुरा जोँनि न' सावबाय
सुथुरा जोँनि बान्दो सिफायबाय
सुथुरा जोँनि आंगोथि खोमाबाय
जांख्रिखांदो जांख्रिखांदो खौसेथि जादो