फांसे बिफांहा दालाइ गैया Poem by Ronjoy Brahma

जावरिसे अखानि थाखायनो
मोदै रथ' रथ' रथ'-
बिनि मोदैजोँ रोदोमो गोबां फुलि
आरो बेन्दोँ-बेनला मानफबो गावखौनो
-
सिमां नुदोँ सानसे अख्रां मोनहैगोन
मिजिँ बेहा मोकथां मुलुगाव
आं गेरेमसा जागोन
सानसे दालाइजोँ बिलाइजोँ
-
नाथाय बिहा दिनै बोलो गैया
हां गहां गहांथारसै
गोदोना सेरथेदोँ लेवा बेन्दोँआ
आरो गुणजेर अरनो हमदोँ रोदा रोदा
-
थेवबो बियो दिनैबो आर'ज गाबदोँ
सान हर सान हर-
जावरिसे जुब जुब अखानि थाखाय
आंखौ हगार आंखौ होनाखै
-
दिनैबो एम्बु फालोसेया
बिनि दुखुआव गाबनो फैयाखै
जारौ सिख्लाया मोसानो फैयाखै
अदेबानि रावबो बेखौ अनलिया
-
सिमांखौ जाफुंहोनो आर'ज
मोकथांनि मिनिगेवलां मोकथांआव
मिजिँखौ जाफुंहोनो बेसेबा आर'ज
सिमां आरो मिजिँ दं सोमखोर जानायनि
-
फांसे बिफांहा दालाइ गैया
बिलाइ गैया
नाथाय थैनो रोङै मिजिँ दं
आं गेरेमसा जागोन आं-