स्लगान/गालांगोन मोनसे स्लगान Poem by Ronjoy Brahma

सैथो दाननि निजोराबायदि
नोँसोरनि बिखा फोर्दान्नायाव
सान्थि होयै जै होयै होयै
रोजाबगोन मेथाइ नोँसोरनि थाखाय
-
मेगन मोदैनि मेथाइजोँ
जाय नोँसोरनि हांमा सुरो
फैमाल इनाय सहायनो जायै गिनायजोँ
बेबादि जिउखौ गारहरगोन
-
सम खोमसिखौ बुस्रांहरनायनि
जेथो मेलेमनि लामाखौ सिनायनो सम
दिनै खेवनायनि सम खुगाखौ
गोमो फिरफिला गोबानो दाउफ्रिया बोदोर
-
हाजो थिखिनियाव बानानै
रोजाबदोँ उदांनि गुफुर दाउथु
रिँखांदोँ बेसेबा खबाम
गोदान गंसे मुलुगनि सुजुनाय
-
गोख्रोँ गोसोखौ फोरानानै
दुखुजोँ रोजाबदोँ मेथाइखौ
अन्थाइ बिखाखौ आवलिहोनो
हगारगोन जोनो जोनो सोरां जिलिद
-
सुथुरनि थिफुद्ला मिनिनायखौ
जोदोब होनो बांग्रिँ जानानै
बायग्रब होनो सुथुरनि देराखौ
बार सार-अन्थाइ जानानै
-
मेथाइखौ रोजाबगोन नोँसोरनि थाखाय
गंसे मुलुगनि सिनायथिजोँ
दोँसे लामायाव आगान होनो हानजा हानजा
बयनिबो खुगायाव जैनि मेथाइजोँ
-
जेरै हराव फैयो अखाफोर हाथर्खि
सानाव फैयो साननि सोरां
बयनिबो जोनोम खुसिनि थाखाय
रोजाबगोन बालाबगासे मेथाइ