हराव उन्दुनो फैयो खोमसि Poem by Ronjoy Brahma

बे खोमसिया लंथंमारसो
हि फेरलेबसेबो गैया मोदोमाव
फांथेदोँ थालिर बिलाइ
मुं मिथियै बिफांनि बिलाइ
-
खावख्लाबसे मोखांजोँ
अखाफोरा नायहरदोँ
जोमैनि गब्लंजोँ आरो
जोमैया हुरा हुरा फांथेबायदोँ
-
हाथर्खिया नायहरदोँ
गुसुथि गाला गाला
हाथाइ रिथि रिथि मिनिहरदोँ
बे खोमसिया लंथंमारसो
-
आं जेब्ला बिजुलि साथिखौ खोमोरो
आरो ग्रद ग्रद हंख्रदफ्लाङो
आंनि बिखायावनो उन्दुलांदोँ
आं जेबो उदिस गैया
-
बे खोमसिया लंथंमारसो
उन्दुलांदोँ बयनिबो बिखायाव
गोदो गोदो आरो
जोँ सिरि मोनस्लाबै खारलांदोँ