स्लगान/बेखायनोथ' आंबो जावलिया जायो Poem by Ronjoy Brahma

हाद्रि आरो उखुन्दैजोँ दावहानि फोथाराव
सुथुरनि बारुद आरो थैजोँ दुगैनाय
दावहारुनि थै रेजेदनायाव
आंबो दिनै बिग्राय खाङो
-
लेवार बेद्लावनि गोदोना दानस'नो
बेखायनोथ' आंबो जावलिया जायो
फिन्नाय गैयैआव फिन्नाय जाबसिन्नो
लांसुनिया सुथुरनि खर' मस्रायनो
-
थैजोँ बुंफबनाय आंनि मुलुगाव
आगान मोनफ्रोम दावहारुनि बेगेँ
अब्लाबो आं आगान होबावबाय
दावहारुनि आगानजोँ राबणनि रायजो सिफायनो
-
उखुन्दै आरो हाद्रिजोँ बुंफबनाय आंनि अख्रां
अब्लाबो आं ओँखारबाय आरोबाव
बेँखन हाद्रि-उखुन्दैखौ बोस्रांनो
रोहो रोहो अर जानानै
-
गलिलांगोन अन्थाइ बिखानि गोरबो
बेरफ्रुगोन दाउखा बिदै खोमसि
आरो फेख्रायलांगोन खिबुआव खि लानानै
लांसुनिया सुथुरनि थिफुद्ला गराय