जेखिजाया आं नोँखौ Auxiliary बायदि बाहायाखै सैनाय।
आं जेराव नोँबो बेवहायनो दं।
नांगौ जायोब्लासो मुलुग गेजेर लैथोमानिफ्राय आं नोँखौ थब्लनानै लाबोआखै।
आं जेब्ला उसु-खुथु जायो होनबा नोँखौ मैना खालामनानै मेथाइ रोजाबनो होआखै।
सुखुबार एबा सुनिबारानो फैबाय थाथोँ,
थाबायथा नोङो आंबायदिनो जेब्लाबो।
आंजोँनो अखा सिजाबाय था,
आंजोँनो गाबफा रंजाफा आंजोँनो।
नंगौ नोङो सानफ्लांदोँ जानो हागौ,
थारैनो आं बेबादिनो मोनदाङो।
मैयानिबो बेसेबा सिगांआवनो फरायनो मोनदोँमोन आं 'बकरी दो गाव खागयी' होन्नानै।
नाथाय बेबादि आं नोँनि मुंखौ लाइजामाव लिरनानै बुरलुंबुथुराव फोजाव हराखै।
बादारि आरो फलानखौ गिनानैनो आं समाय लायाखै दंफां बिगुराव नोँनि मुंखौ लिरनानै।
थैनो रोङै अन्थाइयावबो नोँनि सावगारिखौ मिनिखैरो मोखां बिलिर बिलिर आखियाखै।
अखा फिसियाखै आं जुब जुब अखा हागासिनो थाब्लाबो,
सान्दुंआव फोरानाखै आं ज्रांज्रां दुंस्रेम थारदोँब्लाबो।
आं जेराव गैया, नोँबो बेयावनो गैखाया रजे।
आं बालाबोथिया ना मावानि बाथ्राखौ बुंलिया रजे।
खर' गोमानाय दाक्टार खानानि Chloroform थेब्लेदखौबो जाफ्लाङाखै आं नोँखौ गोदो गोदो बावलांनायनि थाखाय।
अनजालि नोँ आंबायदिनो था,
आंबायदि जानानै था।
मानोना नोँ आंखौ मोजां मोनो,
आंनि गाबनाय आरो मिनिनायखौ मोजां मोनो नोङो।
This poem has not been translated into any other language yet.
I would like to translate this poem