सिख्रि सिख्ला: गयस्रि बिफानि समाय Poem by Ronjoy Brahma

2. गयस्रि बिफानि समाय
गयस्रि बिफानि मुंआ हादां गोरा आरो बिनि बिसिनि मुंआ बोथिया।
सालगुरि गामियाव बयनिबो माहाजोनसिन बियो सुबुं।
नैजि जखाय आरो सानगासे हादां गोरानि बाथोनाव मैसो दं।
जेब्ला बिनियाव आवबा मुंनि लाउखारा गोदानै थाफैयो
अब्ला गोबाव समनिफ्रायनो बैसोआ गयो।
हरफ्रोम हरावनो मैसोआ माथाम माब्रै गयो।
एखमबा बिनिबो बांसिन गनानै मानसिफोरनि आबादखौ जाहैबाय थायो।
बिनि थाखाय खेबफ्रोमबो हादां गोरा माहाजोना जुरिमाना होनो गोनां जायो।
जिग' जिग' आवबा मुंनि लाउखारा रायजाबाय थायो।
माब्लाबा समाव आवबाया माहाजोन हादां गोराजोँ बुजायो।
जोबोद दिखार नांदोँमोन आवबाया आरो गाबदोँमोन बेसेबा दाहायाव।
सानसेखालि बांबुला जोहोलावआ आवबा लाउखारखौ अनखांनानै मैसोनि बिखुंआव जमनायसै।
हर गेजेर जाब्लाबोसो बुहुतआ औवा बिजौनिफ्राय ओँखार बोनायसै।
आयला-जायला खानाय गोफार गोजोँ गोजोँ हाथाइ।
अखाफोर गैयै हराव बिनि मेगना ब्लाब्ला जोँनायसै।
बियो मैसो खाग्रायाव फैनानै मैसोखौ दिरुं हगारना होनायसै।
अब्लासो बांबुला जोहोलावआ बिजोँ हरसे बुलायनायसै।
अखानायै सोरांसि समाव दाउज्ला गेसेरनायनि सिगां बुहुतखौ बांबुला जोहोलावआ बाग्रायनानै बोलोजोँ बुथारनायसै।
बेबादिनो अखानायै फुंआव बांबुला जोहोलावखौ हादां गोराया बिजामादै खालामनो फसाय खोमाबाय।
गोसोजोँ गोसो बियो सान्ना लानायसै।
''सोलोआव जेना बोलोआव जेना माबादि जोहोलाव बेलाइ?
जेरैखि जुलि बांबुला जोहोलावखौ आं बिजामादै खालामथारगोन।''
बे दिननिफ्रायनो हादां गोरानि मैसोआ खाग्रायावनो हरसे थानायसै।
आरो आवबा लाउखारा आलो गोजोनै मैसोफोरखौ उदै सुफुं सुफुं गुमबाय थानो हमनायसै।