सरतखौ गाबज्रिहर Poem by Ronjoy Brahma

दाखोन गैयै उदां अख्रां नायनो
सानमोखाङारि गोगो मेगनजोँ
सरतखौ गाबज्रिहर
नै लोगो फै फै होन्नानै।
देमलो गुरजां मायस्रिनि मोसानाय
सोमखोर दुब्लिनि माय बिदां नायनो
सरतखौ गाबज्रिहर
फैदो माबार फैथारदो होन्नानै।
आलेरा दाउनि मेथाइ खोनासंना
बेसर सबाय सिबिँनि आबाद खालामनो
सरतखौ गाबज्रिहर
नै आबादारि दे गाबज्रिहर।
बेरेमा खंख्रमाया बासा बोसिगोन
बेसर बिदै बुथुम बुथुम
खासि बिबार बारफैसिगोन
देमलो गुरजां बारजोँ मोसानानै।
फोलाया सिखोमाया हाद्रि गोरानाव
दुलाबाथा दाउसिन दुब्रिया मोसागोन
दाउराइनि मोदोमाव गां सुगोन
अरनाव गोदान देँखो रिँखांगोन।
दाखोन गैयै उदां अख्रां नायनो
सरतखौ गाबज्रिहर
सोमखोर दुब्लिनि माय बिदां नायनो
सरतखौ गाबज्रिहर।
उदां अख्रांनि गेवलां बिखायाव
ओजोँ हजोँ फुरसब जोमैया हि सोँगोन
सिंग्रि दाउसा मोख्रेब बिबार बारगोन
आगर एरगोन आसागि बैसागिया।