बयबो आंबादिनो फाफोर नांदोँ
खर' सासा लामा नागिरनानै,
बिरनो हानायमोनब्ला राहाया स्रांमोन
बोहैयोब्लाबो बयनिबो बयनिबो गोलोमदै।
दा मोस्रोमजोँ रुजुनो लाजिथाव
थेवबो गोसो जायो मोस्रोमनि लामाजोँ,
नोँनि आंनि गोलोमदैनि दाहारजोँ
जोँ गोजावलांनो हाथारगौमोन।
मोदै बोहैयो जोँनि सिगां सिगां
रिमोनद्ला जाथारबाय बादामालि खानानै,
बै खबामा आजै आजौखौ सावनायाव
सावफ्ले जादोँ हांगार जाबाय।
आद्रा मेथाइया आबौनि हाखर सिङाव
मिथिगौ गासो गासो फबजादोँ,
जानो हागौ उरि अरबाय नङाबा
आयनि बेमा सोँनाय मेगनाव गोलांदोँ।
एबा मोस्रोमा गावसोरनि गुदुं सिङाव
मायबां नङाबा डिमाफुर गायसनदोँ,
मोस्रोमनि लामा नागिरो आं बेखायनो
फै फै लोगो नोँबो बेजोँनो।
आजै आजौमोननि बै खबामखौ
सुफिन सुनानै खाम बुखो बुखो,
नागिर नागिर थांनि हरै सोनाबहा-
जिउनि साना गागलांनाय लामायाव।
This poem has not been translated into any other language yet.
I would like to translate this poem